Reuters: აშშ-ის შუალედურ არჩევნებამდე ორი თვით ადრე ადგილობრივი ოფიციალური პირები ემზადებიან კრიზისული სცენარისთვის, რომელიც ოდესღაც წარმოუდგენლად ითვლებოდა - რა მოხდება, თუ აშშ-ის პრეზიდენტი ფედერალური მთავრობის ძალაუფლების გამოყენებას არჩევნების შედეგების თავის სასარგებლოდ შემოსატრიალებლად შეეცდება?

აშშ-ის შუალედურ არჩევნებამდე ორი თვით ადრე, რომელმაც შესაძლოა ვაშინგტონში ძალთა ბალანსი შეცვალოს, ადგილობრივი და შტატის ოფიციალური პირები მთელი ქვეყნის მასშტაბით ემზადებიან კრიზისული სცენარისთვის, რომელიც ოდესღაც წარმოუდგენლად ითვლებოდა - რა მოხდება, თუ აშშ-ის პრეზიდენტი ფედერალური მთავრობის ძალაუფლების გამოყენებას არჩევნების შედეგების თავის სასარგებლოდ შემოსატრიალებლად შეეცდება? - წერს საინფორმაციო სააგენტო Reuters-ი.

კალიფორნიაში ოფიციალურმა პირებმა უკვე დაამუშავეს სცენარი, თუ რა მოხდება, თუ დონალდ ტრამპი საარჩევნო უბნებზე ფედერალურ აგენტებს გაგზავნის, რაც ამომრჩეველთა დაშინებასა და აქტივობის შემცირებას გამოიწვევს.

მიჩიგანში შტატის ოფიციალური პირები ადგილობრივ მოხელეებს აძლევენ რეკომენდაციებს, თუ როგორ იმოქმედონ, თუ ფედერალური მთავრობა ხმის მიცემის აპარატებთან წვდომას მოითხოვს.

საარჩევნო ოფიციალური პირები ემზადებიან სამართლებრივი დავებისთვის ყველაფერზე - ბიულეტენების ამოღებით დაწყებული, არჩევნების გაყალბების გამოძიებით დამთავრებული.

Reuters-მა ინტერვიუ ჩაწერა 50-ზე მეტ შტატისა და ადგილობრივ საარჩევნო მოხელესთან ორივე პოლიტიკური პარტიიდან, მათ შორის 12 შტატის სახელმწიფო მდივანთან, რომლებიც თავიანთ რეგიონებში მთავარი საარჩევნო ოფიციალური პირები არიან.

თითქმის ყველას თქმით, შუალედური არჩევნების წინ ისინი ახალ სტრატეგიებს ნერგავენ, რათა მზად იყვნენ პოლიტიკური ჩარევის, დეზინფორმაციის, კიბერშეტევებისა და ძალადობის მუქარისთვისაც კი. ეს ზომები ეხება როგორც დიდ, ისე მცირე საარჩევნო ოლქებს - ტრამპის „რესპუბლიკური“ პარტიისა თუ ოპოზიციური „დემოკრატების“ მიერ კონტროლირებად ტერიტორიებზე.

ეს მზადება ასახავს შტატისა და ადგილობრივი მოხელეების მზარდ შეშფოთებას იმასთან დაკავშირებით, რომ ნოემბრის არჩევნებისთვის ყველაზე დიდ საფრთხეს არა უცხოური ჩარევა ან ტექნიკური ხარვეზები, არამედ თავად ტრამპის ადმინისტრაცია წარმოადგენს, რადგან პრეზიდენტი ცდილობს გააფართოოს ფედერალური მთავრობის როლი არჩევნებში - სფეროში, რომელსაც ტრადიციულად შტატები და ადგილობრივი ხელისუფლება მართავენ.

თეთრმა სახლმა უარყო შეშფოთება იმის შესახებ, რომ ფედერალურმა ქმედებებმა შესაძლოა შუალედური არჩევნები შეაფერხოს. ადმინისტრაცია ამტკიცებს, რომ ის საარჩევნო კანონებს აღასრულებს და კენჭისყრისადმი ნდობას იცავს.