უკრაინის ყოფილი გენპროკურორის განცხადებით, ის საერთაშორისო პარტნიორებს ქვეყნის „ანტიკორუფციულ უწყებებში არსებული რეალური ვითარების შესახებ“ მოუყვება

უკრაინის ყოფილი გენერალური პროკურორის, რუსლან კრავჩენკოს განცხადებით, საზღვარგარეთ ყოფნისას ის გეგმავს საერთაშორისო პარტნიორებს მიაწოდოს ინფორმაცია უკრაინის ანტიკორუფციულ უწყებებში არსებული ვითარების შესახებ.

„ვგეგმავ ინფორმაცია მივაწოდო საერთაშორისო პარტნიორებს, თუ რეალურად რა ვითარებაა ანტიკორუფციული ორგანოების სისტემაში, მათ მიერ უკონტროლო გავლენის კონცენტრაციის ნიშნებისა და რისკების შესახებ, რომელიც ემუქრება სახელმწიფო სუვერენიტეტს, კანონის უზენაესობას და უკრაინის დემოკრატიულ ინსტიტუტებს“, - დაწერა კრავჩენკომ სოციალურ ქსელში.

კრავჩენკომ გენპროკურორის თანამდებობა 8 სექტემბერს უკრაინის ეროვნულ ანტიკორუფციულ ბიუროსთან (NABU) კონფლიქტის გამო დატოვა. მედიის ცნობით, NABU იძიებდა ერთ-ერთი დანაშაულებრივი დაჯგუფების საქმეს, რომელსაც გენპროკურორის ოფისის სტრუქტურული დანაყოფის ერთ-ერთი ხელმძღვანელი მეთაურობდა.

მოგვიანებით, ცნობილი გახდა, რომ კრავჩენკო საფრანგეთში გაემგზავრა. დღეს უკრაინის უმაღლესმა რადამ, პრეზიდენტ ვოლოდიმირ ზელენსკის თხოვნის საფუძველზე, ის თანამდებობიდან ოფიციალურად გაათავისუფლა.