POLITICO: „ჰუსიტების“ წინსვლა ტრამპს მხოლოდ ცუდ არჩევანს უტოვებს

ირანის მიერ მხარდაჭერილი იემენელი „ჰუსიტების“ მიერ სტრატეგიული ტერიტორიების ხელში ჩაგდებამ და მსოფლიო ენერგეტიკულ ბაზრებზე წნეხის კიდევ უფრო გაძლიერებამ აშშ-ის პრეზიდენტ დონალდ ტრამპის ადმინისტრაციას ახლო აღმოსავლეთში კარგი არჩევანი თითქმის აღარ დაუტოვა. ინფორმაციას POLITICO ავრცელებს.

აშშ-ის ადმინისტრაციას შეუძლია კონფლიქტში ჩაერთოს მას შემდეგ, რაც საუდის არაბეთის მიერ მხარდაჭერილმა იემენის სამთავრობო ძალებმა ვერ შეძლეს „ჰუსიტების“ განდევნა წითელი ზღვის პორტ მუხიდან და სამი კუნძულიდან. ეს ტერიტორიები მნიშვნელოვანი სტრატეგიული პუნქტებია, საზღვაო გზაზე კონტროლის თვალსაზრისით.

მეორე ვარიანტია: თეთრმა სახლმა რეგიონი ჰუსიტებთან ბრძოლაში მარტო დატოვოს და ნავთობის ფასების ზრდის შედეგებს შეეგუოს. ორშაბათს ნავთობის ფასი ერთ ბარელზე 109 დოლარამდე გაიზარდა.

ფასების მკვეთრი ზრდა, ერთი მხრივ, ბაბ-ელ-მანდების სრუტეში წითელი ზღვისკენ მიმავალი საზღვაო მიმოსვლის შეფერხებამ გამოიწვია, მეორე მხრივ კი - საუდის არაბეთის მნიშვნელოვანი ნავთობსადენის მუშაობის შეჩერებამ, წერს გამოცემა.

აშშ-სთვის არცერთი ვარიანტი არ არის განსაკუთრებით მიმზიდველი. რეგიონში ერთ-ერთი არაბი დიპლომატის შეფასებით, ვაშინგტონის პოზიციაში უმოქმედობა, ან, როგორც თავად თქვა, „ერთგვარი უგულებელყოფა“ იგრძნობა.

„მათ აქვთ განცდა, რომ აშშ-ს არ სურს რეგიონში, ირანის გარდა, სხვა კონფლიქტში ჩართვა, მიუხედავად იმისა, რომ ეს შეერთებული შტატებისთვის სტრატეგიული უკუსვლაა“, - განაცხადა დიპლომატმა.

„ჰუსიტების“ თავდასხმასთან დაკავშირებით დასმულ კითხვებზე ტრამპის ადმინისტრაციის მაღალჩინოსანმა POLITICO-ს, კომენტარის ნაცვლად, ის პოზიცია გაუგზავნა, რომელიც გამოცემას პირველად აგვისტოს შუა რიცხვებში, მიმდინარე ესკალაციამდე მიაწოდა.

„შეერთებული შტატები ორიენტირებულია ეროვნული უსაფრთხოების ძირითადი ინტერესების დაცვაზე, მათ შორის წითელ ზღვაში ნავიგაციის თავისუფლების უზრუნველყოფაზე და ამავდროულად, ჩვენს რეგიონულ პარტნიორებს აძლევს შესაძლებლობას, ლიდერის როლი შეასრულონ რეგიონული უსაფრთხოების გამოწვევების მართვასა და მოგვარებაში“, - განაცხადა ადმინისტრაციის წარმომადგენელმა. იგივე პოზიცია კი მან 19 აგვისტოსაც გაავრცელა.

ტრამპის ადმინისტრაციის მიერ ხელახლა გავრცელებულ განცხადებაში ასევე ნათქვამია, რომ აშშ „ჰუსიტებისგან“ შარშან მიღწეული ცეცხლის შეწყვეტის პირობების დაცვას ელოდება. შეთანხმების ფარგლებში მეამბოხეებმა ამერიკულ გემებზე თავდასხმების შეწყვეტის პირობა დადეს, სანაცვლოდ კი აშშ-მ ჰუსიტების წინააღმდეგ დაბომბვის კამპანია შეწყვიტა, რომლის დროსაც იემენში, სულ მცირე, 800 სამიზნე განადგურდა.

აშშ-ის ვიცე-პრეზიდენტმა ჯეი დი ვენსმა ჟურნალისტებს განუცხადა, რომ ვაშინგტონს „მუდმივი კონტაქტი აქვს საამიროებთან, საუდის არაბეთთან და რეგიონში სხვა დაზარალებულ მხარეებთან“. მისი თქმით, აშშ „პირდაპირი მოლაპარაკებების პროცესშიც არის ჩართული თავად „ჰუსიტებთან“.

ოფიციალურად, აშშ საუდის არაბეთთან მჭიდრო სამხედრო კავშირების შენარჩუნებას განაგრძობს. აშშ-ის ცენტრალური სარდლობის (CENTCOM) მეთაური, ადმირალი ბრედ კუპერი ჯიდაში საუდის არაბეთის მემკვიდრე პრინც მოჰამედ ბინ სალმანს შეხვდა, იუწყება საუდის არაბეთის სახელმწიფო მედია. CENTCOM-ის საზოგადოებასთან ურთიერთობის სამსახურის ცნობით, შეხვედრაზე „რეგიონული უსაფრთხოების საკითხებში თანამშრომლობა“ განიხილეს.

თუმცა ვაშინგტონში ახალი ომის დაწყების სურვილი შეზღუდული ჩანს, აღნიშნულია სტატიაში.