BBC: უზენაესმა სასამართლომ ტრამპის გეგმა ფოსტით ხმის მიცემის აკრძალვის შესახებ დაბლოკა

აშშ-ის უზენაესმა სასამართლომ პრეზიდენტ დონალდ ტრამპის გეგმა, რომელიც ნოემბრის შუალედურ არჩევნებამდე ფოსტით ხმის მიცემის შეზღუდვას ითვალისწინებდა, დაბლოკა. ინფორმაციას BBC-ი ავრცელებს.

ბრიტანული ტელეარხის ცნობით, სასამართლოს ეს გადაწყვეტილება თეთრი სახლისთვის მნიშვნელოვანი უკუსვლაა.

მოსამართლეებმა ძალაში დატოვეს ფედერალური მოსამართლის გადაწყვეტილება, რომლის მიხედვითაც აშშ-ის საფოსტო სამსახურს დროებით აეკრძალა საფოსტო ბიულეტენებისთვის ახალი მოთხოვნების ამოქმედება.

თუმცა სასამართლოს გადაწყვეტილება, სავარაუდოდ, ამ საკითხზე საბოლოო სიტყვა არ იქნება. კონსერვატორმა მოსამართლემ ბრეტ კავანომ გადაწყვეტილებას მხარი დაუჭირა, თუმცა მიუთითა, რომ საქმის განხილვის გაგრძელების შემდეგ შესაძლოა საბოლოოდ ტრამპის პოზიცია გაიზიაროს, - წერს BBC-ი.

ტრამპი ამტკიცებდა, რომ ახალი წესები არჩევნების გაყალბებას აღკვეთდა. მან მარტში ხელი მოაწერა აღმასრულებელ ბრძანებას, რომლის მიხედვითაც აშშ-ის საფოსტო სამსახურს ბიულეტენები მხოლოდ იმ ამომრჩევლებისთვის უნდა მიეწოდებინა, რომლებიც მოქალაქეთა სიებში არიან რეგისტრირებული.

სასამართლოში შეტანილ სარჩელებში კი აღნიშნული იყო, რომ ეს გადაწყვეტილება შტატების კონსტიტუციურ უფლებებს არღვევდა, რადგან არჩევნების ჩატარება სწორედ შტატების უფლებამოსილებაა.

ბრეტ კავანომ თავის მოსაზრებაში დაწერა, რომ „სულ მცირე, არსებობს საფუძვლიანი ალბათობა“, რომ საბოლოო რეგულაცია საფოსტო სამსახურის კანონით მინიჭებულ უფლებამოსილებაში მოექცევა. თუმცა, მისი თქმით, 2026 წლის არჩევნებზე ამ წესის გამოყენება „თვითნებური და დაუსაბუთებელი“ იქნებოდა.

კონსერვატორმა მოსამართლეებმა სამუელ ალიტომ და კლარენს თომასმა გადაწყვეტილებას არ დაუჭირეს მხარი. მათი განცხადებით, ტრამპის ბრძანების წინააღმდეგ შეტანილი სარჩელი „უკანასკნელი სასოწარკვეთილი მცდელობაა“, რომელიც საბოლოოდ, სავარაუდოდ, წარმატებული ვერ იქნება.

თეთრ სახლს სასამართლოს გადაწყვეტილებაზე კომენტარი ჯერჯერობით არ გაუკეთებია.

ორი წლის წინ გამართულ საყოველთაო არჩევნებში ამომრჩეველთა დაახლოებით 30%-მა ხმა ფოსტით მისცა. მათი უმრავლესობა დემოკრატი იყო.

თეთრ სახლში დაბრუნების შემდეგ ტრამპი ფოსტით ხმის მიცემის შეზღუდვას ცდილობს. მიუხედავად იმისა, რომ თავადაც არაერთხელ მიუმართავს ფოსტით ხმის მიცემისთვის, ტრამპი დიდი ხანია ამტკიცებს, რომ ეს მეთოდი არამოქალაქეებს არჩევნებში მონაწილეობის საშუალებას აძლევს და გაყალბების რისკს ზრდის.