Reuters: რუსულმა ფრეგატმა დანიის სამხედრო ვერტმფრენის მიმართულებით სასიგნალო რაკეტები გაისროლა

რუსულმა ფრეგატმა დანიის სამხედრო ვერტმფრენის მიმართულებით ორი სასიგნალო რაკეტა გაისროლა. ინფორმაციას Reuters-ი ავრცელებს.

გამოცემის ცნობით, ინციდენტი დანიის მახლობლად, საერთაშორისო წყლებში მოხდა. დანიის სამხედრო უწყების ინფორმაციით, რაკეტები ვერტმფრენს მცირე მანძილით ასცდა.

ბალტიის ზღვის რეგიონში უსაფრთხოების ზომები განსაკუთრებით გამკაცრებულია მას შემდეგ, რაც რუსეთის მიერ უკრაინაში 2022 წელს სრულმასშტაბიანი შეჭრის შემდეგ რეგიონში გაზსადენებთან დაკავშირებული ინციდენტები, საჰაერო სივრცის დარღვევები და დრონების გამოჩენის შემთხვევები გახშირდა, რამაც მოსკოვსა და დასავლეთს შორის დაძაბულობა გააძლიერა, წერს Reuters-ი.

დანიის თავდაცვის სარდლობის განცხადებით, სამხედრო ვერტმფრენი Fennec გეგმურ მისიას ასრულებდა და რუსული ფრეგატის ფოტოგადაღებას ცდილობდა.

უწყების ინფორმაციით, ერთ-ერთი სასიგნალო რაკეტა - პიროტექნიკური მოწყობილობა, რომელიც ზღვაში, როგორც წესი, გამაფრთხილებელ სიგნალად გამოიყენება - ვერტმფრენთან ახლოს ჩავარდა.

დანიის პრემიერ-მინისტრმა მეტე ფრედერიქსენმა ინციდენტს სერიოზული უწოდა, თუმცა განაცხადა, რომ ის მოულოდნელი არ ყოფილა. მისი თქმით, შემთხვევა იმ ქმედებების ნაწილია, რომლის ფარგლებშიც „სულ უფრო აგრესიული რუსეთი“ ევროპაში ჰიბრიდულ ომს აძლიერებს და ნატოს შესაძლებლობებს ამოწმებს.

„რუსეთს შიშისა და უთანხმოების დათესვა სურს. ჩვენი პასუხი უფრო მჭიდრო ერთიანობა და დანიისა და ევროპის თავდაცვის გაძლიერებაა“, - განაცხადა ფრედერიქსენმა.

დანიის საგარეო საქმეთა მინისტრმა ლარს ლოკე რასმუსენმა ინციდენტს „მიუღებელი“ უწოდა და განაცხადა, რომ მას შესაძლოა ადამიანების სიცოცხლე საფრთხეში ჩაეგდო.

„დანია მუშაობს იმის უზრუნველსაყოფად, რომ ყველა გემმა დანიის ტერიტორიულ წყლებში მშვიდობიანად გადაადგილება შეძლოს, თუმცა რუსეთი თანდათანობით ცვლის იმ ზღვარს, რომელსაც მისაღებ ქცევად მიიჩნევს“, - განაცხადა რასმუსენმა.

მისივე თქმით, მან დანიაში რუსეთის ელჩი შეხვედრაზე დაიბარა.