Reuters: ნატოს გამანადგურებელმა ლიეტუვაში დრონი ჩამოაგდო

ნატოს გამანადგურებელმა თვითმფრინავმა გვიან ღამით ლიეტუვის ტერიტორიაზე დრონი ჩამოაგდო. ინფორმაციას Reuters-ი ლიეტუვის ეროვნული კრიზისების მართვის ცენტრზე დაყრდნობით ავრცელებს.

ცენტრის წარმომადგენლის განცხადებით, დრონი, რომელიც, სავარაუდოდ, ბელარუსის ტერიტორიიდან შემოვიდა, სამხრეთ ლიეტუვაში, სოფელ პრატკუნაისთან ჩამოაგდეს. დასახლება ქვეყნის სიდიდით მეორე ქალაქ კაუნასთან ახლოს მდებარეობს. ადგილობრივი ხელისუფლების განცხადებით, დრონის წარმომავლობა ჯერჯერობით დადგენილი არ არის.

დრონის გამო განგაში მანამდე ლიეტუვის დედაქალაქ ვილნიუსსა და მის მიმდებარე ტერიტორიაზეც გამოცხადდა, წერს სააგენტო.

ნატოს ბალტიის საჰაერო თავდაცვის მისიის ფარგლებში ალიანსის ავიაგამანადგურებლები ლატვიის, ლიეტუვისა და ესტონეთის საჰაერო სივრცეს 2004 წელს ამ ქვეყნების ალიანსში გაწევრიანების შემდეგ პატრულირებენ.

როგორც Reuters-ი იუწყება, მისიის ფარგლებში მაისში ავიაგამანადგურებლებმა ესტონეთის, ივნისსა და აგვისტოში კი ლატვიის თავზე უკრაინული დრონები ჩამოაგდეს, რომლებიც საჰაერო სივრცეში შემთხვევით აღმოჩნდნენ.

სააგენტოს ცნობით, უკრაინამ რუსეთის წინააღმდეგ შორი მანძილზე მოქმედი დრონებით თავდასხმები გააძლიერა, მათ შორის ბალტიის ზღვის რეგიონშიც. რამდენიმე უკრაინული სამხედრო დრონი ფინეთის, ლატვიის, ლიეტუვისა და ესტონეთის საჰაერო სივრცეში შემთხვევით აღმოჩნდა.

უკრაინამ მომხდარი ინციდენტები რუსეთის ელექტრონული ბრძოლის საშუალებებს დაუკავშირა და განაცხადა, რომ სწორედ მათი ზემოქმედების შედეგად შეიცვალა დრონების ფრენის მიმართულება.