უკრაინელმა სამხედროებმა რუსეთის სამარის ოლქში ნავთობგადამამუშავებელი ქარხანა და ტაგანროგში Ozon-ის საწყობი დაბომბეს

უკრაინულმა ძალებმა 15 სექტემბრის ღამეს რუსეთის სამარის ოლქში მდებარე სიზრანის ნავთობგადამამუშავებელ ქარხანას დაარტყეს, ხოლო როსტოვის ოლქის ქალაქ ტაგანროგში რუსული ონლაინ-ვაჭრობის გიგანტ Ozon-ის საწყობი რაკეტებით დაბომბეს. ინფორმაციას უკრაინული მედია ავრცელებს.

ადგილობრივების ინფორმაციით, უკრაინული დრონების დარტყმის შემდეგ სიზრანის ნავთობგადამამუშავებელი ქარხნის ტერიტორიაზე და რამდენიმე სხვადასხვა უბანში ხანძარი გაჩნდა.

სამარის ოლქის გუბერნატორმა ვიაჩესლავ ფედორიშჩევმა მოგვიანებით განაცხადა, რომ რეგიონში 40-ზე მეტი უკრაინული დრონი ჩამოაგდეს. მისივე ინფორმაციით, დაზიანდა სამრეწველო ობიექტი, რამდენიმე საცხოვრებელ კორპუსში კი ფანჯრები ჩაიმსხვრა.

ამასთან, რუსეთის სამხრეთში, ქალაქ ტაგანროგში, უკრაინული რაკეტებით Ozon-ის კუთვნილი საწყობი დაიბომბა. ამის შესახებ როსტოვის ოლქის გუბერნატორმა იური სლიუსარმა განაცხადა.

გუბერნატორის ცნობით, ტაგანროგში ორ საცხოვრებელ კორპუსში ფანჯრები ჩაიმსხვრა. კიდევ სამი საცხოვრებელი სახლი, საგანმანათლებლო დაწესებულება, გაზსადენი, კომერციული შენობა, სასურსათო მაღაზია და სასოფლო-სამეურნეო კომპანიის კუთვნილი საწყობები დაზიანდა.