Financial Times: აზერბაიჯანში დაკავებული საფრანგეთის რამდენიმე მოქალაქის გათავისუფლების შეთანხმების ფარგლებში, საფრანგეთი ევროკავშირის წევრ ქვეყნებს სთხოვს, მოუხსნან სანქციები რუს ოლიგარქს, ალიშერ უსმანოვს

ინფორმირებული წყაროების თანახმად, აზერბაიჯანში დაკავებული საფრანგეთის რამდენიმე მოქალაქის გათავისუფლების შეთანხმების ფარგლებში, საფრანგეთი ევროკავშირის წევრ ქვეყნებს სთხოვს, მოუხსნან სანქციები რუს ოლიგარქს, ალიშერ უსმანოვს. ინფორმაციას ამის შესახებ ბრიტანული გამოცემა Financial Times-ი ავრცელებს.

მოლაპარაკებების შესახებ ინფორმირებული სამი პირის თქმით, აზერბაიჯანში დაკავებული საფრანგეთის რამდენიმე მოქალაქის გათავისუფლების შეთავაზებული გარიგება აფერხებს ევროკავშირის ძალისხმევას, გაახანგრძლივოს სანქციები დაახლოებით 2 600 ფიზიკური და იურიდიული პირის მიმართ, რომლებიც პუტინის უკრაინაში შეჭრის საპასუხოდ დაწესდა.

კომპრომისის სახით, ევროკავშირის ქვეყნები შეთანხმდნენ სანქციების რეჟიმის ერთი კვირით გაგრძელებაზე, რათა მოლაპარაკებები გაგრძელდეს. ორშაბათს, უფრო ადრე, საფრანგეთმა და სლოვაკეთმა ვეტო დაადეს სანქციების სრული 12 თვით განახლებას, თუ უსმანოვს სიიდან არ ამოიღებდნენ - განუცხადა FT-ს კიდევ სამმა ოფიციალურმა პირმა. ოთხშაბათამდე შეთანხმების მიუღწევლობა ყველა სხვა რუსი მოქალაქისა და კომპანიის სიიდან ამოღებას გამოიწვევდა.

საფრანგეთის მოულოდნელმა მოთხოვნამ ევროკავშირის დიპლომატები გაოგნებული დატოვა. ერთ-ერთმა მათგანმა ეს ნაბიჯი „გაუგონარად“ შეაფასა.