ბელგიაში პოლიციელი ხელბორკილებიან ქალს ფიზიკურად გაუსწორდა - დაწყებულია გამოძიება. ვიდეო

სოციალურ ქსელებში გავრცელებულ ვიდეოს, სადაც ბელგიაში, ნიველ-ჟენაპის პოლიციელი ხელბორკილებიან ქალს ფიზიკურად უსწორდება, საზოგადოების მკვეთრი რეაქცია მოჰყვა. ინფორმაციას ამის შესახებ ბელგიური მედია ავრცელებს.

პროკურატურამ მომხდარზე გამოძიება უკვე დაიწყო, ქალაქის მერმა კი ინციდენტს „მიუღებელი“ და „გაუმართლებელი“ უწოდა.

ვიდეოკადრებში ჩანს, რომ დაკავებული ქალი პოლიციის ავტომობილში ჩაჯდომაზე უარს ამბობს. ამ დროს ერთ-ერთი ოფიცერი მას სახეში ძლიერად ურტყამს და მანქანაში ძალით ტენის. ინციდენტს კიდევ ორი პოლიციელი ადევნებდა თვალს, თუმცა კოლეგის ქმედებაში არცერთი ჩარეულა.

პროკურატურის ცნობით, პოლიცია თავდაპირველად საგზაო ავარიის ადგილზე მივიდა, სადაც მძღოლები ვერ თანხმდებოდნენ. მოგვიანებით ვითარება დაიძაბა და სამართალდამცველებმა ოქმი დაუმორჩილებლობის მუხლით შეადგინეს. გამოძიებამ ახლა უნდა დაადგინოს, რატომ გამოიყენა პოლიციელმა ძალა დაკავებულზე, რომელიც იმ მომენტში არანაირ საფრთხეს არ წარმოადგენდა.

ქალაქ ნიველის მერის, ბერნარ დე როს განცხადებით, პოლიციელის ასეთი რეაქცია ყოველგვარ ზღვარს სცილდება. მან ჩართული პირების იდენტიფიცირებისა და პასუხისმგებლობის დაკისრების მიზნით შიდა უწყებრივი შემოწმება დაუყოვნებლივ დაიწყო.