The Guardian: ტრამპმა ნატალი ჰარპსა და თეთრი სახლის სხვა თანამშრომლებს, სადღესასწაულო საჩუქრად 45 000 დოლარი გადასცა

აშშ-ის პრეზიდენტმა დონალდ ტრამპმა, თეთრი სახლის ოთხ თანამშრომელს, მათ შორის აღმასრულებელ ასისტენტს ნატალი ჰარპს, მნიშვნელოვანი სადღესასწაულო საჩუქრები გადასცა - 45 000 დოლარი. ინფორმაციას The Guardian-ი, ადმინისტრაციის მიერ გამოქვეყნებულ ახალ ფინანსურ დეკლარაციებზე დაყრდნობით ავრცელებს.

როგორც გამოცემა იუწყება, 45 000 დოლარი ასევე მიიღეს კომუნიკაციების მრჩეველმა მარგო მარტინმა და ოვალური კაბინეტის ოპერაციების დირექტორის მოადგილემ ჩემბერლენ ჰარისმა, ხოლო ოვალური კაბინეტის ოპერაციების დირექტორმა უოლტ ნაუტამ, 20 000-დოლარიანი საჩუქარი მიიღო.

საჩუქრების შესახებ ინფორმაცია თანამშრომელთა ყოველწლიურ ფინანსურ დეკლარაციებშია ასახული, რომლებიც ადმინისტრაციამ გასულ კვირას გამოაქვეყნა. თეთრი სახლის კონგრესისთვის წარდგენილი სახელფასო ანგარიშის თანახმად, ჰარპის, მარტინისა და ჰარისის წლიური ხელფასი, 150 000 დოლარია, ნაუტასი კი — 175 000 დოლარი.

თეთრი სახლის წარმომადგენელმა Associated Press-ს განუცხადა, რომ ტრამპს „დიდი ხანია აქვს საშობაო საჩუქრების გაცემის პრაქტიკა მის გარემოცვაში მყოფი ადამიანებისთვის, მათ შორის ზოგჯერ თანამშრომლებისა და თანაშემწეებისთვისაც, როგორც სახელმწიფო სამსახურში ყოფნისას, ისე კერძო სექტორში მუშაობის პერიოდში“.

წარმომადგენელს არ დაუკონკრეტებია, მიიღეს თუ არა პრეზიდენტისგან მსგავსი საჩუქრები სხვა თანამშრომლებმაც, თუმცა აღნიშნა, რომ ფულადი საჩუქრები „არ უკავშირდებოდა ამ პირთა ოფიციალურ სამსახურებრივ მოვალეობებს და შესაბამისად, სრულად დასაშვებია შესაბამისი სამართლებრივი და ეთიკური სტანდარტების მიხედვით“.

ჰარპი ტრამპის გვერდით მუდმივად იმყოფება და ცნობილია იმით, რომ თან დააქვს პორტატული პრინტერი, რათა პრეზიდენტისთვის ხელსაყრელი მედიაგაშუქება და სოციალური ქსელების პოსტები ამობეჭდოს. ტრამპი მნიშვნელოვანი ინფორმაციის ეკრანზე წაკითხვას ქაღალდზე გაცნობას ამჯობინებს, წერს გამოცემა.

მარტინი ტრამპთან ჯერ კიდევ მისი პირველი საპრეზიდენტო ვადის პერიოდში მუშაობდა. მან კარიერა თეთრი სახლის პრეს-ასისტენტად დაიწყო და 2020 წლის არჩევნებში ჯო ბაიდენთან ტრამპის დამარცხების შემდეგ პრეზიდენტს ფლორიდის შტატის ქალაქ პალმ-ბიჩში გაჰყვა. ტრამპის 2024 წლის გამარჯვების შემდეგ ის კვლავ დაბრუნდა თეთრ სახლში.

მიმდინარე წლის დასაწყისში ტრამპმა ჰარისი აშშ-ის სახვითი ხელოვნების კომისიაში დანიშნა. კომისია პრეზიდენტის მიერ თეთრ სახლში სამეჯლისო დარბაზის პროექტის ზედამხედველობას ახორციელებს.