Euronews: კაია კალასს ევროკავშირის დედაქალაქები ყველაზე მეტად იმ დროს უპირისპირდებიან, როცა მათი მხარდაჭერა ყველაზე მეტად სჭირდება

ევროკავშირის საგარეო პოლიტიკის ხელმძღვანელმა კაია კალასმა მორიგი პოლიტიკური მარცხი განიცადა მას შემდეგ, რაც წევრმა ქვეყნებმა მისი უკანასკნელი ინიციატივა, შეექმნა ექსპერტთა ჯგუფი ევროპული თავდაცვის საკითხებზე, ჩაშალეს. ინფორმაციას Euronews-ი ავრცელებს.

ტელეარხის ცნობით, ეს იმ დროს ხდება, როდესაც ევროკავშირის საგარეო ქმედებათა სამსახურს (EEAS) რეფორმირება სჭირდება და ამის გამო ზეწოლას განიცდის.

კვირას, ბოლო წუთს, ევროკავშირის საგარეო ქმედებათა სამსახურმა გააუქმა ახალი მაღალი დონის ჯგუფის შექმნის გეგმა. ჯგუფს უნდა მოემზადებინა ანგარიში, რომელიც ევროპული თავდაცვის შესაძლებლობების გაძლიერების გზებს განსაზღვრავდა და სტრატეგიული ინვესტიციების მიმართულებით არსებულ ხარვეზებს გამოავლენდა.

კალასმა, რომელიც საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელია, ინიციატივა სულ რამდენიმე დღით ადრე გამოაცხადა. მისი თქმით, მიზანი იყო, „უსაფრთხოებისა და თავდაცვის სფეროში ყველაზე გამორჩეულმა სპეციალისტებმა ერთად მოიყარონ თავი და მართლაც არასტანდარტული გადაწყვეტილებები შემოგვთავაზონ“.

„გადავწყვიტეთ, ამ ინიციატივით წინ აღარ წავიდეთ. ზოგიერთმა წევრმა ქვეყანამ მიიჩნია, რომ ამ ეტაპზე ეს სწორი მიმართულება არ იყო“, - განუცხადა Euronews-ს ევროკავშირის ერთ-ერთმა ოფიციალურმა წარმომადგენელმა, რომელმაც ვინაობის გამხელა არ ისურვა.

როგორც Euronews-ი წერს, ეს შემთხვევა კიდევ ერთხელ აჩვენებს, რომ კალასი ზოგჯერ ცდილობს წინსვლას აუცილებელი პოლიტიკური მხარდაჭერის გარეშე, მაშინ როდესაც წევრი ქვეყნების, განსაკუთრებით მცირე სახელმწიფოების მხარდაჭერა მისთვის საუკეთესო საშუალებაა, რომ ევროკავშირის საგარეო ქმედებათა სამსახურის რელევანტურობა შეინარჩუნოს.

ინიციატივის წინააღმდეგ ყველაზე აქტიურად იტალია გამოვიდა და მისი შექმნის წინააღმდეგ მტკიცე პოზიცია დააფიქსირა მას შემდეგ, რაც ჯგუფში თავდაცვის მინისტრ გვიდო კროზეტოს ერთ-ერთ მთავარ პოლიტიკურ მოწინააღმდეგედ აღქმული პირი შეიყვანეს.

იტალიური საინფორმაციო სააგენტო ANSA-ს ცნობით, საუბარი რობერტა პინოტიზე იყო, რომელიც თავდაცვის მინისტრის პოსტს მატეო რენცისა და პაოლო ჯენტილონის ცენტრისტულ-მემარცხენე მთავრობებში იკავებდა. ორივე ყოფილი პრემიერ-მინისტრი პოლიტიკური მიმართულებით მოქმედი იტალიური ხელისუფლებისგან განსხვავებულ ბანაკს წარმოადგენს.

საფრანგეთმა და კიდევ რამდენიმე ქვეყანამაც გააპროტესტა ექსპერტთა ჯგუფის შექმნა და აღნიშნა, რომ ინიციატივა მინისტრების დონეზე არ განხილულა და ევროპული მთავრობების უმრავლესობისთვის მოულოდნელი აღმოჩნდა, იუწყება ტელეარხი.

ზეწოლა იმდენად ძლიერი აღმოჩნდა, რომ ევროკავშირის საგარეო ქმედებათა სამსახურს ინიციატივის გაუქმება მოუხდა.

ევროკავშირის სამმა ოფიციალურმა წარმომადგენელმა, რომლებმაც თემის სიფრთხილიდან გამომდინარე ანონიმურად დარჩენა ისურვეს, ინიციატივას შესაბამისად „არასწორად მართული“, „სამწუხარო“ და „სრულიად ჩაფლავებული“ უწოდეს, რაც აჩვენებს, რამდენად ფართო იყო უკმაყოფილება პროცესის მიმდინარეობის გამო, აღნიშნულია სტატიაში.