ნიუ-იორკის სასამართლომ ჰარვი ვაინშტაინს 15 წლით თავისუფლების აღკვეთა მიუსაჯა
კულტურა
ფოტო: Reuters
ნიუ-იორკის სასამართლომ ჰოლივუდის ყოფილ პროდიუსერს, ჰარვი ვაინშტაინს, სექსუალური ძალადობის საქმეზე 15 წლით პატიმრობა მიუსაჯა. ბრალდების მხარის ცნობით, 2006 წელს ვაინშტაინმა თავის ასისტენტს მირიამ ჰეილის მასთან იძულებით დაამყარებინა სექსუალური კავშირი. პროკურატურა 74 წლის პროდიუსერისთვის 20 წლით თავისუფლების აღკვეთას ითხოვდა.
სასამართლოში გამოსვლისას ვაინშტაინმა საკუთარი უდანაშაულობის შესახებ განაცხადა. „გულწრფელად ვწუხვარ იმ ტკივილის გამო, რაც მირიამ ჰეილიმ განიცადა. თუმცა იძულებული ვარ, კიდევ ერთხელ განვაცხადო ჩემი უდანაშაულობის შესახებ“, - აღნიშნა მან.
ვაინშტაინს აღნიშნულ ეპიზოდზე განაჩენი ადრეც გამოუტანეს. 2020 წელს ის დამნაშავედ ცნეს მსახიობ ჯესიკა მანის გაუპატიურებასა და მირიამ ჰეილის მიმართ სექსუალურ ძალადობაში, რის გამოც 23 წლით პატიმრობა მიესაჯა. თუმცა 2024 წლის აპრილში ნიუ-იორკის სააპელაციო სასამართლომ განაჩენი გააუქმა და საქმე ხელახლა განსახილველად დააბრუნა.
2025 წლის ივნისში ნაფიც მსაჯულთა სასამართლომ ვაინშტაინი ჰეილის ეპიზოდში კვლავ დამნაშავედ ცნო, ყოფილი მოდელის, კაია სოკოლას ეპიზოდში კი გაამართლა.
მიუხედავად 2024 წელს ნიუ-იორკის პირველადი განაჩენის გაუქმებისა, ვაინშტაინი პატიმრობაში რჩებოდა, რადგან 2023 წელს ლოს-ანჯელესის სასამართლომ ის 2013 წელს ჩადენილი გაუპატიურებისა და სექსუალური ძალადობის ეპიზოდებზე დამნაშავედ ცნო და 16 წლით თავისუფლების აღკვეთა მიუსაჯა.
