სინდი კროუფორდის ვაჟი, მოდელი პრესლი გერბერი 27 წლისა გარდაიცვალა

სინდი კროუფორდის ვაჟი, მოდელი პრესლი გერბერი 27 წლისა გარდაიცვალა. ინფორმაცია CNN-ს სუპერმოდელის წარმომადგენელმა დაუდასტურა.

ლოს-ანჯელესის ოლქის სამედიცინო ექსპერტიზის ოფისის ცნობით, გერბერი კვირას, სარეაბილიტაციო ცენტრში ყოფნისას გარდაიცვალა. სიკვდილის ოფიციალური მიზეზი მითითებული არ არის. კროუფორდის პრესმდივანმა ცნობა დაადასტურა და CNN-ს განუცხადა: „ოჯახი ითხოვს კონფიდენციალურობის დაცვას ამ უაღრესად მძიმე და მტკივნეულ დროს“.

1999 წელს კალიფორნიაში დაბადებული გერბერი სინდი კროუფორდისა და ბიზნესმენ რანდე გერბერის ორი შვილიდან ერთ-ერთი იყო. საკუთარი დის, კაია გერბერის მსგავსად, მან სამოდელო ინდუსტრიაში მოღვაწეობა ადრეულ ასაკში დაიწყო - იტალიური ბრენდის, Moschino-ს ჩვენებაზე მისი დებიუტი სულ რაღაც 16 წლის ასაკში შედგა.

ბოლო წლებში გერბერი ღიად საუბრობდა ფსიქიკურ ჯანმრთელობასთან დაკავშირებულ პრობლემებსა და ნარკოტიკების მოხმარებაზე. სამოდელო სააგენტო DNA Model Management-ის თანახმად, ის ხელმძღვანელობდა საკუთარ ინიციატივას Mental Health Mondays (ფსიქიკური ჯანმრთელობის ორშაბათები) და თანამშრომლობდა არასამთავრობო ორგანიზაციებთან, მათ შორის ლოს-ანჯელესის უსახლკაროთა საქველმოქმედო ფონდთან - A Sense of Home.