ვატიკანი ისტორიაში პირველად „ოსკარზე“ ფილმს წარადგენს

„ოსკარის“ პრემიის არსებობის 97 წლის განმავლობაში პირველად, ვატიკანი ჯილდოს მისაღებად ფილმს წარადგენს.

Variety-ს ცნობით, ამ კვირაში ლოს-ანჯელესში გაიმართება ვატიკანის მიერ გადაღებული მოკლემეტრაჟიანი დოკუმენტური ფილმის „მწვანე ლავა“ პრემიერა. სურათის რეჟისორები ლია ბელტრამი და ალი აქსუ არიან. სურათი მოგვითხრობს ახალგაზრდა იტალიელზე, სახელად ჯაკომო მატივი, რომელიც დიუშენის კუნთოვანი დისტროფიით არის დაავადებული.

39-წუთიან ფილმს 18-დან 24 სექტემბრის ჩათვლით ბევერლი-ჰილზის კინოთეატრ Lumiere Music Hall-ში აჩვენებენ. ამის შემდეგ გადამღები ჯგუფი მოამზადებს დოკუმენტაციას ფილმის „ოსკარზე“ წარსადგენად, კატეგორიაში „საუკეთესო მოკლემეტრაჟიანი დოკუმენტური ფილმი“. ეს გახდება პირველი ნამუშევარი, რომელიც ვატიკანის მიერ არის გადაღებული.

„ჯაკომოს ისტორია იმსახურებს, რომ მის შესახებ ყველამ შეიტყოს, ამიტომ მოხარულნი ვართ, რომ გვექნება შესაძლებლობა, ფილმი „ოსკარის“ პრემიის ნომინანტთა სიაში ჩავრთოთ“, - განაცხადა ვატიკანის საზოგადოებასთან ურთიერთობის დიკასტერიის ხელმძღვანელმა, პაოლო რუფინიმ.

თუმცა, ფილმი არ წარადგენს სახელმწიფოს, როგორც ცალკეულ ნომინანტს. საქმე ის არის, რომ მოკლემეტრაჟიანი სურათები არ მოითხოვს ოფიციალური განაცხადის წარდგენას რომელიმე ქვეყნის მთავრობის ან ეროვნული კომიტეტის მხრიდან დასტურს.