ლევან მამალაძე: ეს არაბიზაციის თემა, ფაქტობრივად, არის მოგონილი, არაფერზე დაყრდნობილი, არანაირ ციფრსა და არანაირ სტატისტიკაზე

ეს არაბიზაციის თემა, ფაქტობრივად, არის მოგონილი, არაფერზე დაყრდნობილი, არანაირ ციფრსა და არანაირ სტატისტიკაზე, - განაცხადა გადაცემაში „იმედის კვირა“ სტრატეგიული დაგეგმარების ცენტრის ხელმძღვანელმა, მეცნიერებათა დოქტორმა ლევან მამალაძემ.

მისივე თქმით, სამწუხაროდ, ეს მიმართულება პატრიოტული განცდის მატარებელმა ორგანიზაციებმა, როგორიც არის „კონსერვატორული მოძრაობა“, გამოიყენეს გაუთვითცნობიერებელი ადამიანების მანიპულირებისათვის.

„ამ ხალხს აქვს უამრავი სოციალური, საოჯახო პრობლემა და პატრიოტულ განცდაზე შემოიტანეს ისეთი სეგმენტი, რომლითაც გამოიწვიეს ამ მიმართულების დეგრადაცია. ეს, უბრალოდ, არის საზოგადოების მანიპულირება და არა, ვთქვათ, შინაარსობრივი დატვირთვის საკითხი. ველოდოთ, როცა ჩვენი საზოგადოების ნაწილი ვიღაცის მანიპულირების საგანი გახდება და არ დავეხმაროთ მათ? სიმართლე არ ვუთხრათ?

რაც შეეხება ასეთ მსხვილ ინვესტიციებს, ეს ქვეყნისთვის აუცილებელი მიმართულებაა, ინვესტიციას მოაქვს მშენებლობა, მოაქვს ინფრასტრუქტურა, დასაქმების საკითხები და ამ თვალსაზრისით ეს „იგლ ჰილსის“ პროექტი იქნება, „ტრამპ თაუერი“ იქნება თუ მსგავსი მსხვილი ქვეყნების შემოსვლა საქართველოს ეკონომიკაში და ინფრასტრუქტურის განვითარებაში, ეს არის აუცილებელი პირობა ჩვენი ტიპის ქვეყნების ეკონომიკაში, რათა გავაძლიეროთ და უფრო მყარი ეკონომიკა შეიქმნას“, - აღნიშნა ლევან მამალაძემ.