ქუთაისის საერთაშორისო უნივერსიტეტმა საერთაშორისო ტექნოლოგიური კომპანიების ინვესტორებს უმასპინძლა

ეკონომიკისა და მდგრადი განვითარების სამინისტროს სსიპ ინვესტიციების სააგენტოს ორგანიზებით, საქართველოში 12 საერთაშორისო კომპანიის წარმომადგენლებისთვის საინვესტიციო ტური მიმდინარეობს. ვიზიტის ფარგლებში ქუთაისის საერთაშორისო უნივერსიტეტს (KIU) საერთაშორისო ტექნოლოგიური კომპანიების ხელმძღვანელები ეწვივნენ. სტუმრებს სამუშაო შეხვედრაზე ქუთაისის საერთაშორისო უნივერსიტეტის კანცლერმა ლევან კოპალიანმა უმასპინძლა.

ინვესტორები ადგილზე გაეცნენ KIU-ს აკადემიურ და კვლევით პოტენციალს და მაღალკვალიფიციური კადრების მომზადების შესაძლებლობებს. აღნიშნული ვიზიტის ფარგლებში სააგენტო პოტენციურ ინვესტორებს ადგილობრივ ბიზნესთან, საგანმანათლებლო დაწესებულებებსა და საჯარო სექტორთან აკავშირებს, რაც მათ შესაძლებლობას აძლევს საქართველოში ინვესტირების პოტენციალი ადგილზე შეაფასონ.

უნივერსიტეტისთვის საერთაშორისო კომპანიებთან ურთიერთობა ქმნის ახალ პერსპექტივებს სტაჟირების, დასაქმების, პრაქტიკულ პროექტებში ჩართვისა და პროფესიული გაძლიერების კუთხით. KIU-ს კურსდამთავრებულები კონკურენტუნარიანი კადრები არიან როგორც ადგილობრივ, ისე საერთაშორისო დასაქმების ბაზარზე.

მსგავსი შეხვედრები და ვიზიტები კიდევ ერთხელ წარმოაჩენს უნივერსიტეტის აკადემიური პროგრამების ხარისხს, საგანმანათლებლო და კვლევითი საქმიანობის შედეგებს და იმ კომპეტენციებს, რომლებსაც სტუდენტები სწავლის პროცესში იძენენ. ამასთან, ინდუსტრიებთან მჭიდრო თანამშრომლობა ხელს უწყობს საგანმანათლებლო პროგრამების შრომის ბაზრის მოთხოვნებთან შესაბამისობას და KIU-ს, როგორც საერთაშორისო სტანდარტების საგანმანათლებლო და კვლევითი ცენტრის გაფართოებას.