„მართლმადიდებელი ეკლესია ჯვართამაღლების დღესასწაულს აღნიშნავს. გილოცავთ დღევანდელ დღეს! ეს დღე იმედია უკეთესი ხვალინდელი დღის, დაკარგულის დაბრუნების - ჩვენ აუცილებლად დავბრუნდებით აფხაზეთში - ოღონდ არა ომით და აგრესიით, არამედ მშვიდობით, ურთიერთპატიებით და შენდობით" - ირაკლი ჩიხლაძის მონოლოგი

მართლმადიდებელი ეკლესია ჯვართამაღლების დღესასწაულს აღნიშნავს. მაცხოვრის ჯვარცმიდან თითქმის სამასი წლის შემდეგ ქრისტიანებმა მანამდე დაკარგული უდიდესი სიწმინდე - უფლის ცხოველმყოფელი ჯვარი მოიძიეს და მისი თაყვანისცემის საშუალება მიეცათ. გილოცავთ დღევანდელ დღეს! ეს დღე იმედია უკეთესი ხვალინდელი დღის, დაკარგულის დაბრუნების - ჩვენ აუცილებლად დავბრუნდებით აფხაზეთში - ოღონდ არა ომით და აგრესიით, არამედ მშვიდობით, ურთიერთპატიებით და შენდობით, - ასე მიულოცა მაყურებელს ჯვართამაღლების დღესასწაული ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა ირაკლი ჩიხლაძემ.

მან მშვიდობისა და შერიგების მნიშვნელობაზე გაამახვილა ყურადღება და აღნიშნა, რომ აუცილებელია სიფხიზლე, რათა პოლიტიკური დაპირისპირებით და რადიკალური განცხადებებით მშვიდობისკენ გადადგმულ ნაბიჯებს ზიანი არ მიადგეს.

„აფხაზეთი - თითოეული ჩვენგანის ტკივილი და მოუშუშებელი იარა.

33 წლის წინ სოხუმი დაეცა.

ამ სიტყვების წარმოთქმაც კი მძიმეა, არათუ იმ რეალობის გააზრება და თვალის გასწორება, რომელშიც მთელი ქვეყანა, თაობები აღმოვჩნდით.

ჩვენი სახლები, ჩვენი ქუჩები და ქალაქები დღესაც ოკუპირებულია.

ენგურს გაღმა და გამოღმა მცხოვრები ქართველები და აფხაზები ელოდებიან იმ ისტორიულ დღეს, როდესაც მავთულხლართებს მშვიდობის ხიდები ჩაანაცვლებს და საუკუნეების ტრადიცია გაგრძელდება - თანაცხოვრება ერთიან, ძლიერ და მთლიან საქართველოში.

აფხაზეთი ჩვენი ტკივილია.

33 წლის შემდეგ მთავარი კითხვა კვლავ უცვლელია - როგორ მივიდეთ იმ დღემდე, როდესაც ენგურის ხიდი თავისუფლების და ერთიანი საქართველოს ახალი სიმბოლო გახდება?

როგორ შევძლებთ დაბრუნებას ომის გარეშე, შერიგებას და ერთიანობას - მტრობის გარეშე?

მშვიდობისთვის ბრძოლა ნამდვილად გადის პრაგმატულ პოლიტიკაზე.

შერიგების გზაზე ურთიერთპატიებისთვის ძალის მოკრებაც მოგვიწევს, მაგრამ ამავე დროს აუცილებელია სიფხიზლე, რათა პოლიტიკური დაპირისპირებით და რადიკალური განცხადებებით მშვიდობისკენ გადადგმული ნაბიჯები არ დაზიანდეს.

27 სექტემბერი მხოლოდ ტრაგიკული თარიღი არ არის.

ეს არის დღე, რომელიც კიდევ ერთხელ გვახსენებს, თუ რა ნაბიჯები უნდა გადავდგათ - მშვიდობისთვის, შერიგებისთვის და საქართველოს გამთლიანებისთვის“, - აღნიშნა ირაკლი ჩიხლაძემ.