შალვა პაპუაშვილი: ჩვენი მიზანი იყო, რომ სათანადო პატივი მიგვეგო იმ მემკვიდრეობისთვის, რომელიც ჩვენმა ემიგრაციამ დაგვიტოვა ლევილის მამულის სახით, გუშინ ისტორიული დღე იყო

2023 წელს ვიყავი ლევილში, მახსოვს ის მდგომარეობა, რაც მაშინ იყო და როდესაც გუშინ ვნახეთ ლევილი, შენობები და მთლიანად ტერიტორია როგორც არის მოწყობილი, ეს არის [განსხვავებული, როგორც] ცა და დედამიწა. ლევილის მერიც იმყოფებოდა იქ და ძალიან ბევრი მადლობა გადაიხადეს. მათ თქვეს, რომ ლევილი ვერასდროს შეძლებდა ამ მამულის ასე აღდგენას და მადლიერი არიან საქართველოს სახელმწიფოს მიმართ, - განაცხადა პარლამენტის თავმჯდომარე შალვა პაპუაშვილმა, რითაც უპასუხა კითხვას - „რა იცით ლევილის რეაბილიტაციის შესახებ, გავრცელდა ინფორმაცია, რომ ისე არ გაკეთდა ყველაფერი, რაც კონტრაქტით იყო გათვალისწინებული“.

პაპუაშვილის თქმით, ეს არის ჩვენი ისტორიის ნაწილი, რომელსაც სათანადო გაფრთხილება და მოვლა სჭირდება.

„ჩვენი მიზანი იყო, რომ სათანადო პატივი მიგვეგო იმ მემკვიდრეობისთვის, რომელიც ჩვენმა ემიგრაციამ დაგვიტოვა ლევილის მამულის სახით. ამისთვის სახელმწიფომ გაიღო მნიშვნელოვანი თანხები და გუშინ ისტორიული დღე იყო. სათანადო პატივის მიგება სჭირდებათ ჩვენ წინაპრებს, რომლებმაც დამოუკიდებლობის იდეა შემოგვინახეს“, - აღნიშნა პაპუაშვილმა.