ზაქარია მხარგრძელის ქუჩაზე გზის რეაბილიტაცია დასრულების ეტაპზეა

სამგორის რაიონში საგზაო ინფრასტრუქტურის მოწესრიგება გრძელდება. ამჯერად, ზაქარია მხარგრძელის ქუჩაზე სარეაბილიტაციო სამუშაოები სრულდება.

სამგორის რაიონის მუნიციპალიტეტის ინფორმაციით, პროექტის ფარგლებში, 4 500 კვადრატულ მეტრ ფართობზე დაიგო ასფალტის ორფენიანი საფარი, მოეწყო ტროტუარები და მოწესრიგდა მიწისქვეშა კომუნიკაციები. პროექტის ჯამური ღირებულება 500 000 ლარს შეადგენს.

განხორციელებულ სამუშაოებს სამგორის რაიონის გამგებელი კახა სამხარაძე და საკრებულოს მაჟორიტარი დეპუტატი გიორგი დოხტურიშვილი გაეცნენ.

„ზაქარია მხარგრძელის ქუჩის რეაბილიტაცია ადგილობრივი მოსახლეობისთვის წლების განმავლობაში არსებული საგზაო ინფრასტრუქტურის პრობლემის მოგვარებას ითვალისწინებს. სამგორის რაიონში ინფრასტრუქტურული პროექტების განხორციელება ეტაპობრივად გაგრძელდება“, - აცხადებენ მუნიციპალიტეტში.