გარემოს ეროვნულმა სააგენტომ ქვეყნის მასშტაბით მყინვარული ხეობების მონიტორინგი ჩაატარა

გარემოს ეროვნული სააგენტოს სპეციალისტებმა ქვეყნის მასშტაბით მყინვარული ხეობების მორიგი მონიტორინგი ჩაატარეს. კვლევის მიზანია გლაციალური საფრთხის შეფასება, პოტენციური რისკის ზონების გამოვლენა და მყინვარულ ხეობებში მიმდინარე პროცესების დინამიკის შესწავლა.

მონიტორინგის ფარგლებში, სპეციალისტებმა მყინვარული ხეობები ვერტმფრენით დაათვალიერეს, საველე-ექსპედიციური გზით მათ ვიზუალური და ინსტრუმენტული მონიტორინგი ჩაატარეს, ხოლო, არსებული მდგომარეობის ანალიზის მიზნით, ტერიტორიები დრონებით გადაიღეს.

მიღებული მონაცემების საფუძველზე, თანამედროვე ტექნოლოგიების გამოყენებით, ქვეყნის მასშტაბით გლაციალური საფრთხე შეფასდება და დადგინდება პოტენციური რისკის ქვეშ მყოფი ტერიტორიები.

მონიტორინგის ფარგლებში, წელს პირველად გამოიყენეს თანამედროვე ბათიმეტრიული წყლის დრონი, რომლის საშუალებითაც მყინვარულ ხეობებში არსებული ტბების მორფომეტრიული პარამეტრები შეფასდა.

კლიმატური ცვლილებების ფონზე, კავკასიონის პერიგლაციალურ ზონებში მყინვარების დეგრადაციის პროცესები მიმდინარეობს. მათ შორის შეინიშნება მყინვარული ტბების წარმოქმნა და მათი ფართობის ცვლილება, ასევე მორენული მასივების მდგომარეობისა და ხეობებში აკუმულირებული მასალის დინამიკა.

მიმდინარე პროცესების მდგომარეობისა და დროთა განმავლობაში ცვლილებების შესაფასებლად, გარემოს ეროვნული სააგენტო საქართველოს სხვადასხვა რეგიონში შესაბამისი ტერიტორიების მიზნობრივ მონიტორინგს ყოველწლიურად ატარებს.