საგარეო საქმეთა სამინისტროს სტრატკომი: ტელეკომპანია „პირველმა“ ყაზახეთში მყოფი საქართველოს ოთხი მოქალაქის შესახებ მცდარი ინფორმაცია გაავრცელა

ტელეკომპანია „პირველმა“ 2022 წლის 8 იანვარს, დაახლოებით, 11:30 საათზე გაავრცელა მცდარი ინფორმაცია ყაზახეთში მყოფი საქართველოს ოთხი მოქალაქის შესახებ, რომლებიც დახმარებას ითხოვენ და საგარეო საქმეთა სამინისტროსა და საქართველოს საელჩოს უყურადღებობაში ადანაშაულებენ, - ამის შესახებ აღნიშნულია საგარეო საქმეთა სამინისტროს სტრატკომის მიერ გავრცელებულ განცხადებაში.

„გაცნობებთ, რომ აღნიშნულ საქართველოს მოქალაქეებთან (მ.ჯ. , ყ.ლ., წ.შ. და ჯ.გ. ) საქართველოს საელჩოს, ისევე როგორც საქართველოს საპატიო კონსულს ალმათიში აქვს ყოველდღიური კავშირი და საჭიროების მიხედვით უწევს დახმარებას. აღნიშნული საქართველოს მოქალაქეები იმყოფებიან ქალაქ ალმათიდან მოშორებით, კერძო სახლში და არიან უსაფრთხოდ.
საქართველოს საგარეო საქმეთა სამინისტროს საკონსულო დეპარტამენტი, ასევე, მუდმივ კავშირზეა საქართველოში მყოფ მათი ოჯახის წევრებთან“, - ნათქვამია სოციალურ ქსელში საგარეო საქმეთა სამინისტროს სტრატკომის მიერ გავრცელებულ განცხადებაში.