სიმართლე იმ რეკრეაციულ ზონაზე, რომელიც ბიზნესმენ ვანო ჩხარტიშვილის კომპანიამ ესტონელი ბიზნესმენისგან იყიდა - დამალული სიმართლის ფასი. „იმედის კვირის“ საავტორო რეპორტაჟი

ნინო ზურიაშვილმა კალამი აშკარად ლურსმანზე ჩამოკიდა? მისი წარსული პროფესიული სტანდარტის გათვალისწინებით, რთული წარმოსადგენია ისეთი რეპორტაჟის ხილვა, რომელიც სტუდია „მონიტორმა“ შემოგვთავაზა, - განაცხადა ტელეკომპანია „იმედის“ გენერალური დირექტორის მოადგილემ, გადაცემა „იმედის კვირის“ წამყვანმა ირაკლი ჩიხლაძემ სტუდია „მონიტორის“ მიერ მომზადებულ მასალასთან დაკავშირებით.

ჩიხლაძის თქმით, აღნიშნული რეპორტაჟი არის საზოგადოების მიზანმიმართულად შეცდომაში შეყვანის მცდელობა და დიდი ალბათობით, დაკვეთილი ტყუილის ტირაჟირების კლასიკური მაგალითი.

„ალბათ, სწორედ ეს იყო მიზეზი, რომ საკუთარი რეპორტაჟის ავტორობა დამალა და მთხრობლად სხვა ჟურნალისტი შემოგვთავაზა, რომელმაც „იმედის კვირიასთან“ აღიარა, რომ „უარის ფასის“ ავტორი არა ის, არამედ ნინო ზურიაშვილია.

თუ ფიქრობთ, რომ ახლა მე სტუდია „მონიტორს“ ვესხმი თავს, ძალიან ცდებით. მსურს სიმართლე მოგიყვეთ იმ რეკრეაციულ ზონაზე, რომელიც ბიზნესმენ ვანო ჩხარტიშვილის კომპანიამ იყიდა ესტონელი ბიზნესმენისგან.

დაახლოებით, 10 ჰექტარი მიწის ფართობი მან არა ბიზნესინტერესებისთვის, არამედ რეკრეაციული ზონის შენარჩუნების მიზნით შეიძინა. 5 დოლარი კვადრატულ მეტრში - დავიჯერო, სწორედ ამ ფასმა მიიქცია „მონიტორის“ ყურადღება? არის ერთი დეტალი, რომელიც მაყურებელმა აუცილებლად უნდა იცოდეს და შემდეგ ბევრ კითხვას თავადვე გასცემს პასუხს.

საქმე ეხება დაახლოებით 10 ჰექტარ მიწას, რომელზეც განაშენიანება აკრძალულია, ანუ არაფრის აშენება არ შეიძლება. ეს ყველაფერი ვანო ჩხარტიშვილმა „მონიტორს“ აუხსნა, თუმცა მისი პასუხი, რა თქმა უნდა, სიუჟეტში დამახინჯებული კონტექსტით მოხვდა. სრული პასუხი კი მოგვიანებით თავად ჩხარტიშვილმა გამოაქვეყნა.

არადა, იმავე სიუჟეტში ლაპარაკია ესტონელი ინვესტორის მიერ 331ჰექტარი მიწის დაახლოებით 9 მილიონ ლარად შეძენაზე, ანუ კვადრატულ მეტრში დაახლოებით 1 დოლარი აქვს გადახდილი. სწორედ აქ ჩნდება მთავარი კითხვა: თუ რეკრეაციული სტატუსის მქონე მიწის კვადრატულ მეტრში გადახდილი 5დოლარი საჭიროებს განმარტებას, მოკვლევას, ე.წ. ჟურნალისტურ გამოძიებას, რატომ არ ისმის იგივე კითხვა 331 ჰექტარ მიწასთან დაკავშირებით?

კვადრატულ მეტრში ესტონელმა ბიზნესმენმა ოლეგ ოსინოვსკიმ 1 დოლარი გადაიხადა. სხვათა შორის, ეს ის ინვესტორია, რომელიც ვერ მალავს საკუთარ კეთილგანწყობას მაშინდელი ეკონომიკის მინისტრის, გიორგი კვირიკაშვილისა და მისი მოადგილე დიმიტრი ქუმსიშვილის მიმართ.

კვირიკაშვილთან და ქუმსიშვილთან ნადვილად ბევრი კითხვაა: რა ინტერესით უქმნიდნენ სასათბურე პირობებს ესტონელ ბიზნესმენს? გიორგი კვირიკაშვილი „იმედის“ ზარებს აღარ პასუხობს, ქუმსიშვილი კი მოკლე ტექსტური შეტყობინებით მხოლოდ არხის მიმართ პატივისცემას ადასტურებს, საქმეზე კი კომენტარს გაურბის.

არადა, „მონიტორის“ კამერის წინ შესაშურად პოზირებდა და ნინო ზურიაშვილის კითხვებსაც ამომწურავად პასუხობდა“, - განაცხადა ჩიხლაძემ.

დამალული სიმართლის ფასი - ნახეთ სანდრო გამსახურდიას საავტორო რეპორტაჟში.