გივი მიქანაძემ ქუთაისის საერთაშორისო უნივერსიტეტის (KIU) კურსდამთავრებულთა გამოსაშვებ ღონისძიებაში მიიღო მონაწილეობა

საქართველოს განათლების, მეცნიერებისა და ახალგაზრდობის მინისტრმა გივი მიქანაძემ ქუთაისის საერთაშორისო უნივერსიტეტის (KIU) კურსდამთავრებულთა 2026 წლის კურსდამთავრებულთა გამოსაშვებ ღონისძიებაში მიიღო მონაწილეობა.

მინისტრმა ქუთაისის საერთაშორისო უნივერსიტეტის განვითარების მნიშვნელობაზე ილაპარაკა და კურსდამთავრებულებს წარმატებები უსურვა.

„გულითადად გილოცავთ ქუთაისის საერთაშორისო უნივერსიტეტის კურსდამთავრებულებს სწავლის დამთავრებას. თქვენი შრომით, შემართებითა და ძალიან დიდი ძალისხმევით დამსახურებულად მოიპოვეთ ქუთაისის საერთაშორისო უნივერსიტეტის კურსდამთავრებულის საპატიო სტატუსი.

მჯერა, რომ უნივერსიტეტში მიღებულ ცოდნასა და გამოცდილებას წარმატებით გამოიყენებთ პროფესიულ საქმიანობაში, ღირსეულად გააგრძელებთ წინსვლას და თქვენს წვლილს შეიტანთ ჩვენი ქვეყნის განვითარებასა და გაძლიერებაში.

ახლა თქვენთვის ცხოვრების მნიშვნელოვანი ეტაპი იწყება. გისურვებთ, რომ ეს გზა სავსე იყოს საინტერესო შესაძლებლობებითა და პროფესიული მიღწევებით. არასოდეს დაკარგოთ ცოდნის მიღების სურვილი, საკუთარი შესაძლებლობების რწმენა და სწრაფვა უკეთესი მომავლისკენ.

დღეს ყველას ძალიან გვეამაყება საქართველოში ქუთაისის საერთაშორისო უნივერსიტეტის არსებობა — თანამედროვე კამპუსით, საერთაშორისო სტანდარტების შესაბამისი ინფრასტრუქტურითა და უმაღლესი კვალიფიკაციის პროფესორ-მასწავლებლებით.

მინდა განსაკუთრებული მადლიერება გამოვხატო ბატონი ბიძინა ივანიშვილისა და მისი ოჯახის მიმართ. საერთაშორისო სტანდარტების შესაბამისი უნივერსიტეტის დაფუძნება და შემდგომ სახელმწიფოსთვის მისი უსასყიდლოდ გადაცემა არამხოლოდ უმნიშვნელოვანესი საქველმოქმედო საქმე, არამედ საკუთარი ქვეყნისა და მომავალი თაობებისადმი უდიდესი პატრიოტიზმისა და პასუხისმგებლობის გამოხატულებაა“, - განაცხადა გივი მიქანაძემ.

ქუთაისის საერთაშორისო უნივერსიტეტის საბაკალავრო საფეხური წელს 250-მდე სტუდენტმა დაასრულა, ორ საერთაშორისო სამაგისტრო პროგრამას კი პირველი კურსდამთავრებულები ჰყავს.

საზეიმო ცერემონია ქუთაისის საერთაშორისო უნივერსიტეტის აღმასრულებელმა დირექტორმა და რექტორმა ვახტანგ ცაგარელმა გახსნა.

ღონისძიებაში მონაწილეობა მიიღო TUM-ის ემერიტუს პრეზიდენტმა, ქუთაისის საერთაშორისო უნივერსიტეტის საპატიო პრეზიდენტმა, პროფესორმა ვოლფგანგ ა. ჰერმანმა, რომელმაც, რექტორთან და სკოლების დეკანებთან ერთად, კურსდამთავრებულებს დიპლომები გადასცა.

ღონისძიებას ესწრებოდნენ საკანონმდებლო ორგანოს, ადგილობრივი ხელისუფლებისა და აკადემიური სფეროს წარმომადგენლები.

გამოსაშვები საზეიმო ღონისძიება გალა-კონცერტით დასრულდა.

ინფორმაციას განათლების სამინისტრო ავრცელებს.