ხულოს მუნიციპალიტეტის მერიის მხარდაჭერითა და საფეხბურთო კლუბ „ხიხანის“ ორგანიზებით, ფეხბურთში გოჩა შავაძისა და ჯუმბერ შანთაძის ხსოვნისადმი მიძღვნილი ტურნირი გაიმართა

ხულოს მუნიციპალიტეტის მერიის მხარდაჭერითა და საფეხბურთო კლუბ „ხიხანის“ ორგანიზებით, ფეხბურთში გოჩა შავაძისა და ჯუმბერ შანთაძის ხსოვნისადმი მიძღვნილი ტურნირი გაიმართა, - ინფორმაციას ხულოს მუნიციპალიტეტის მერია ავრცელებს.

უწყების ცნობით, ტურნირი ორი დღის განმავლობაში მიმდინარეობდა და მასში მონაწილეობა მუნიციპალიტეტის 14-მა გუნდმა მიიღო.

„ტურნირის გამარჯვებული ბოძაურის გუნდი „მთიელი“ გახდა, მეორე ადგილი გუნდმა „ბოძაური“ დაიკავა, მესამე ადგილზე კი გუნდი „კურიერი“ გავიდა.

ტურნირს ხულოს მუნიციპალიტეტის მერი ვახტანგ ბერიძე, აჭარის უმაღლესი საბჭოს წევრი მინურ პაქსაძე, მერის მოადგილე ნური გორგაძე და ადგილობრივი თვითმმართველობის წარმომადგენლები დაესწრნენ.

ვახტანგ ბერიძემ გამარჯვებულ გუნდებს წარმატება მიულოცა და აღნიშნა, რომ ჯანსაღი ცხოვრების წესის პოპულარიზაცია, სპორტისა და ახალგაზრდების მხარდაჭერა მუნიციპალიტეტის ერთ-ერთი პრიორიტეტია.

„მნიშვნელოვანია, რომ ახალგაზრდებს ჰქონდეთ შესაძლებლობა, ჩაერთონ სპორტულ აქტივობებში და საკუთარი შესაძლებლობები გამოავლინონ. ჯანსაღი ცხოვრების წესის პოპულარიზაციასა და სპორტის განვითარებას მომავალშიც აქტიურად დაუჭერს მხარს“, - აღნიშნა ვახტანგ ბერიძემ.

ტურნირის გამარჯვებულ და საპრიზო ადგილზე გასულ გუნდებს თასები, მედლები, სიგელები და ფულადი ჯილდოები გადაეცათ.

ტურნირის მიზანი ჯანსაღი ცხოვრების წესის პოპულარიზაცია და ახალგაზრდებში ფეხბურთისადმი ინტერესის გაზრდაა“, - აღნიშნულია გავრცელებულ ინფორმაციაში.