ხულოს მუნიციპალიტეტის მერი ვახტანგ ბერიძე, მოადგილე ნური გორგაძესთან ერთად, სოფელ ბეღლეთის საჯარო სკოლის ახალგაზრდებს შეხვდა

ხულოს მუნიციპალიტეტის მერი ვახტანგ ბერიძე, მოადგილე ნური გორგაძესთან ერთად, სოფელ ბეღლეთის საჯარო სკოლის ახალგაზრდებს შეხვდა. ინფორმაციას ხულოს მერია ავრცელებს.

შეხვედრაზე მოსწავლეებმა ახალგაზრდებისთვის მნიშვნელოვან საკითხებზე ისაუბრეს, წარმოადგინეს პრეზენტაცია განხორციელებული აქტივობების შესახებ და მუნიციპალიტეტში ახალგაზრდული ინიციატივების განვითარების მიმართულებით საკუთარი იდეები წარადგინეს.

მხარეებმა განიხილეს ახალგაზრდების ჩართულობის, არაფორმალური განათლების, კულტურული, სპორტული და საგანმანათლებლო აქტივობების გაძლიერების შესაძლებლობები. ახალგაზრდებმა ასევე ისაუბრეს იმ საჭიროებებსა და გამოწვევებზე, რომლებიც მათთვის აქტუალურია.

ვახტანგ ბერიძემ ახალგაზრდებს ხულოს მუნიციპალიტეტის მერიის მიერ ახალგაზრდული მიმართულებით განხორციელებული და დაგეგმილი პროექტები გააცნო. მისი თქმით, ახალგაზრდების იდეებისა და ინიციატივების მხარდაჭერა მუნიციპალიტეტის ერთ-ერთ მნიშვნელოვან პრიორიტეტად რჩება.

„მნიშვნელოვანია, ახალგაზრდებს ჰქონდეთ შესაძლებლობა, საკუთარი იდეები და ხედვები წარმოადგინონ და უშუალოდ იყვნენ ჩართული მუნიციპალიტეტის განვითარებაში. მერია მომავალშიც გააგრძელებს ახალგაზრდების ინიციატივების მხარდაჭერას და მათთვის შესაბამისი შესაძლებლობების შექმნას“, - განაცხადა ვახტანგ ბერიძემ.

შეხვედრის დასასრულს ახალგაზრდებმა მუნიციპალიტეტის წარმომადგენლებთან სამომავლო თანამშრომლობის საკითხებზე იმსჯელეს და ახალი ინიციატივების განხორციელების შესაძლებლობები განიხილეს.