ნინო ლაცაბიძე: რუსთავის ფლორის გამრავალფეროვნება, რომელიც დღეს მიმდინარეობს, უმნიშვნელოვანესია ჩვენი ქალაქის ეკოლოგიისთვის

საქართველოს ინფრასტრუქტურის სამინისტროს მუნიციპალური განვითარების ფონდის პროგრამის - „მწვანე ინფრასტრუქტურა მდგრადი მომავლისთვის" ფარგლებში, შემოდგომაზე რუსთავში კიდევ 2000 ძირი ხე დაირგვება.

ქალაქის შესასვლელსა და გასასვლელში, ავტომაგისტრალის მიმდებარე ტერიტორიის გამწვანების მიზნით, მეორე ეტაპზე 800 ძირი ლეილანდი, 400 ჭადარი, 800 არიზონა კიპარი ირგვება. პროექტის განხორციელება კი გაზაფხულზე დაიწყო და პირველ ეტაპზე ქალაქის შემოსასვლელსა და საბავშვო ბაგა-ბაღების ტერიტორიაზე, სხვადასხვა სახეობის 1000-ზე მეტი ძირი ხე-მცენარე დაირგო.

„რუსთავში ვაგრძელებთ ქალაქის გამწვანების მასშტაბურ პროექტებს. საშემოდგომო სამუშაოების ფარგლებში, ქალაქის შემოსასვლელში ამ შემოდგომაზე, 2000 ძირი ახალი ნარგავი გაჩნდება. მადლობას ვუხდი საქართველოს ინფრასტრუქტურის სამინისტროს ძალიან მნიშვნელოვანი ეკოლოგიური პროექტისთვის, რომელსაც ჩვენს ქალაქში და საქართველოს სხვა რეგიონებში ახორციელებს. ძალიან მახარებს ის ფაქტი, რომ ამ სამუშაოებში განსაკუთრებით აქტიურობენ ჩვენი გამწვანების სამსახურის ახალგაზრდა თანამშრომლები. რუსთავის ფლორის გამრავალფეროვნება, რომელიც დღეს მიმდინარეობს, უმნიშვნელოვანესია ჩვენი ქალაქის ეკოლოგიისთვის“, - განაცხადა რუსთავის მერმა ნინო ლაცაბიძემ.

რუსთავში რამდენიმე დღეში განახლდება ჭალის ტყის გამწვანების სამუშაოებიც.
ახალი მწვანე სივრცეების შექმნა დაგეგმილია რუსთავის ცენტრალურ და შიდა უბნებშიც.
დენდროლოგიური კომპონენტი გათვალისწინებულია ყველა იმ პროექტში, სადაც რუსთავის მერია გზისა და ტროტუარების რეაბილიტაციას ახორციელებს. გაგრძელდება საბავშვო ბაღების და სკოლების მიმდებარე ტერიტორიების გამწვანებაც.