არჩილ გორდულაძე: საქართველო იბრუნებს თავის ისტორიულ ფუნქციას და დანიშნულებას, რომელსაც აღმოსავლეთისა და დასავლეთის დაკავშირება ჰქვია და ალოგიკურია, როდესაც შავ ზღვაზე გასასვლელი ქვეყნების სამიტი იმართება და ევრობიუროკრატიის წარმომადგენელს საქართველო არ ახსენდება

საქართველო იბრუნებს თავის ისტორიულ ფუნქციას და დანიშნულებას, რომელსაც აღმოსავლეთისა და დასავლეთის დაკავშირება ჰქვია და ალოგიკურია, როდესაც შავ ზღვაზე გასასვლელი ქვეყნების სამიტი იმართება და ევრობიუროკრატიის წარმომადგენელს საქართველო არ ახსენდება, - განაცხადა იურიდიულ საკითხთა საპარლამენტო კომიტეტის თავმჯდომარე არჩილ გორდულაძემ გადაცემაში „დღის ქრონიკა“.

მისი თქმით, რადგან ევროკავშირში გადაწყვეტილებებს მხოლოდ პოლიტიკური მოტივებით იღებენ, ამან ისინი იმ შედეგებამდე მიიყვანა, რომლებიც დღეს აქვთ. გორდულაძის განცხადებით, ეს არა საქართველოს, არამედ თავად ევროკავშირს აყენებს ზიანს, რადგან ევროკავშირს არანაკლებ სჭირდება საქართველო, ვიდრე საქართველოს - ევროკავშირი.

„მაშინ, როდესაც ჩვენ გვყავს ევროკავშირის ხშირად არარჩეული ბიუროკრატია, რომლებიც არც გამჭვირვალედ მუშაობენ და ძალიან ბევრი პრობლემა და სკანდალი აქვთ, ეს ადამიანები არიან ისინი, ვინც საქართველოში გამჭვირვალობას ებრძვიან და აფინანსებენ ისეთ მიმდინარეობებსა და ძალებს, რომლებიც ხშირად ფაშისტური განცხადებებით არიან წარმოდგენილი.

მაგალითად, „კორძის“ სიმღერა რამდენად არის გამოხატვის თავისუფლება და, ზოგადად, ხელოვნება, ეს საზოგადოებამ ძალიან კარგად იცის.

ასევე დასტურდება, რომ ხშირად გადაწყვეტილებების მიღებისას, ევროპარლამენტშიც კი, კენჭისყრაში მონაწილეობს რამდენიმე ასეულობით ადამიანი, რომლებსაც საერთოდ წაკითხულიც კი არ აქვთ ის დოკუმენტები, რომელ საკითხზეც კენჭისყრა მიმდინარეობს.

ჩვენ ასევე ნანახი გვაქვს, რომ რუკაზე, მაგალითად, ირანს ვერ პოულობენ. როდესაც ასეთ დონეზე იღებენ გადაწყვეტილებას, რომელიც არის სუფთა პოლიტიკური, ვიღებთ იმ შედეგს, რომელიც გვაქვს.

ეს შედეგები არა საქართველოს, არამედ თავად ევროკავშირს აყენებს ზიანს, რადგან კიდევ და კიდევ ევროკავშირს არანაკლებ სჭირდება საქართველო, ვიდრე საქართველოს - ევროკავშირი.

შევახსენებ მათ, რომ საქართველო იბრუნებს თავის ისტორიულ ფუნქციას და დანიშნულებას, რომელსაც აღმოსავლეთისა და დასავლეთის დაკავშირება ჰქვია და ალოგიკურია, როდესაც შავ ზღვაზე გასასვლელი ქვეყნების სამიტი იმართება და ევრობიუროკრატიის წარმომადგენელს საქართველო არ ახსენდება“, - განაცხადა გორდულაძემ.

მისივე თქმით, დიალოგს ალტერნატივა არ აქვს და საქართველო მაქსიმალურად იყენებს ყველა პლატფორმას სიმართლის სათქმელად, რამდენად გაიგებენ და გაიაზრებენ ამას, ეს უკვე მათი საქმეა.