შალვა პაპუაშვილი: ჩვენ თავის დროზე, 2022 წელს არ ავყევით ესკალაციას, თორემ დღეს ნაომარი, დანგრეული ქვეყანა ვიქნებოდით და ამ გადმოსახედიდან შევხედავდით, ნელ-ნელა როგორ ჩაეხუტებიან ისევ რუსეთს, როგორც 2008 წლის შემდეგ ჩაეხუტნენ - საუკუნეებია, ვიცით, რომ საქმე საქმეზე რომ მიდგება, ჩვენ ვართ ჩვენი თავის პატრონები

მე მგონი, ქართველმა ხალხმა უკვე დიდი ხანია, გაშიფრა საერთაშორისო პოლიტიკის არსი. ღირებულებები, რომლებზეც საუბრობენ, მაშინ არის ღირებულებები, როცა მათთვის არის სასარგებლო, - ასე უპასუხა საქართველოს პარლამენტის თავმჯდომარემ ჟურნალისტის კითხვას ევროკავშირის მიერ სასანქციო სიიდან რუსი ბიზნესმენების, ალიშერ უსმანოვისა და მიხეილ ფრიდმანის ამოღების შესახებ.

შალვა პაპუაშვილის თქმით, სწორედ ამიტომ არ აჰყვა საქართველო 2022 წელს ესკალაციას.

„როდესაც ეს მათთვის სასარგებლო არ არის, მაშინ ეს ღირებულებები იფარება ეროვნული და უსაფრთხოების ინტერესის ტერმინებით.

ასე რომ, ამიტომ ჩვენ თავის დროზე, 2022 წელს არ ავყევით ესკალაციას, თორემ დღეს ნაომარი, დანგრეული ქვეყანა ვიქნებოდით და ამ გადმოსახედიდან შევხედავდით, ნელ-ნელა როგორ ჩაეხუტებიან ისევ რუსეთს, როგორც 2008 წლის შემდეგ ჩაეხუტნენ. გადატვირთვაც ჰქონდათ - გადატვირთვის ღილაკს დააჭირეს, ეკონომიკური პროექტები დაიწყეს, „ნორდ სტრიმის“ შენება დაიწყო გერმანიამ, ჩართეს ყველაფერში ისე, თითქოს, ჩვენი ომი არ ყოფილიყო მაშინ.

ამიტომ საქართველომ 2008 წელს ჭკუა ისწავლა ამ ყველაფრისგან. საუკუნეებია, ჩვენ ისეც ვიცით, რომ საქმე საქმეზე რომ მიდგება, ჩვენ ვართ ჩვენი თავის პატრონები და ჩვენი ინტერესებით სხვა არ იქცევა. ყველა იქცევა თავისი ინტერესებით. აქედან გამომდინარე, აი, ეს იქნებოდა ჩვენი შედეგი - დანგრეული ქვეყანა შევხედავდით, როგორ წავა დათბობის პოლიტიკა რუსეთთან თუ გამონაკლისების გამართლება უსაფრთხოების მიზნებით. ასე რომ, მომავალშიც ასე უნდა შევხედოთ - ჩვენი ინტერესით არც ერთი ქვეყანა არ მოქმედებს, ერთადერთი არის საქართველოს ხელისუფლება, ვინც მოქმედებს საქართველოს ინტერესით“, - განაცხადა შალვა პაპუაშვილმა.