ლევან მახაშვილი ქუჩის პროტესტზე: ეს არის ჩვეულებრივი აგრესიული თემი, რომლის მიზანიც არის დესტრუქციის შემოტანა საზოგადოებაში. აქ გამორჩეული როლი აქვთ ბრიუსელის იმ წარმომადგენლებს, რომლებიც ამ წლების განმავლობაში კვებავდნენ სწორედ ამ დესტრუქციას ქართულ საზოგადოებაში

ყველაფერი თავისი გარდაუვალი დასასრულისკენ წავიდა, - განაცხადა ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა ქუჩის პროტესტის შესახებ, რომელზეც ვრცელი პოსტი დღეს სოციალურ ქსელში პარლამენტის თავმჯდომარემ გამოაქვეყნა.

მახაშვილის შეფასებით, პროტესტის მონაწილეები არის აგრესიული თემი, რომელიც ძალიან შორს არის დემოკრატიისგან.

„როგორი მაღალფარდოვანი პოზიციებითაც არ უნდა შემოსულიყვნენ თავის დროზე ამ პროტესტში, როდესაც შენ არ ითვალისწინებ სხვის აზრს, როდესაც გაქვს რადიკალური დამოკიდებულებები საბოლოო ჯამში ადრე თუ გვიან ყველაფერი მივა აქ. ეს არის ფსევდორელიგიური, აგრესიული თემი, რომელიც ძალიან შორს არის დემოკრატიისგან, მოსახლეობის ამა თუ იმ წრის პოზიციების გამოხატვისგან, სამოქალაქო დიალოგისგან. ეს არის ჩვეულებრივი აგრესიული თემი, რომლის მიზანიც არის დესტრუქციის შემოტანა საზოგადოებაში. აქ გამორჩეული როლი აქვთ ბრიუსელის იმ წარმომადგენლებს, რომლებიც ამ წლების განმავლობაში კვებავდნენ სწორედ ამ დესტრუქციას ქართულ საზოგადოებაში", - აცხადებს ლევან მახაშვილი.

შალვა პაპუაშვილმა პროტესტის შესახებ სოციალურ ქსელში ვრცელი პოსტი გამოაქვეყნა: „ოპოზიციური დღეთაღრიცხვით დღეს „პროტესტის“ 666-ე დღეა. ეს მრგვალი თარიღი კარგი შესაძლებლობაა, საფუძვლიანად აღვწეროთ, როგორ გარდაიქმნა პოლიტიკური პროტესტის აქტივისტთა ჯგუფი ფსევდორელიგიურ მოძრაობად და როგორ მივიღეთ საკუთარი რიტუალების, სიმბოლოების, კალენდრისა და შიდა მორალური წესრიგის მქონე აგრესიული თემი - ფსევდორელოგიური ფუნდამენტალისტური სექტა".