ირაკლი ქადაგიშვილი საქართველო-ევროკავშირის ურთიერთობაზე: ზოგადად, დიალოგის შეწყვეტაც და განახლებაც დამოკიდებული იყო არა რაღაც კონკრეტულ საზომზე, არამედ უფრო მეტად პოლიტიკურ მიზნებზე

დიდ გეოპოლიტიკურ მიზნებს შეეწირა ევროკავშირსა და საქართველოს შორის არსებული მთელი ეს პლასტი, - განაცხადა რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ ირაკლი ქადაგიშვილმა.

მისი თქმით, საქართველო-ევროკავშირს შორის ურთიერთობის შეცვლა განსაკუთრებით 2022 წელს, უკრაინაში რუსეთის შეჭრის შემდეგ გამოიკვეთა.

„ზოგადად, დიალოგის შეწყვეტაც და განახლებაც დამოკიდებული იყო არა რაღაც კონკრეტულ საზომზე, არამედ უფრო მეტად პოლიტიკურ მიზნებზე. სამწუხარო იყო ის, რომ საქართველოსთან ეს პოლიტიკური დიალოგი და საქართველოს სვლა ევროკავშირის მიმართულებით, რომელიც ძალიან წარმატებული იყო და მიზანმიმართულად კარგად მიმდინარეობდა, ამ პოლიტიკური გადაწყვეტილებების მთელი ჯაჭვის ზეგავლენის ქვეშ მოხვდა. ეს ყველაფერი განსაკუთრებით მკვეთრად და მკაფიოდ გამოიკვეთა 2022 წელს, უკრაინაში რუსეთის შეჭრის შემდეგ“, - აღნიშნა ქადაგიშვილმა.

მისი თქმით, 2022 წელს საქართველოს ხელისუფლების დამოკიდებულება იყო, რომ არავითარ შემთხვევაში არ შევიდოდა კონფრონტაციასა და საომარ დაპირისპირებაში რუსეთის ფედერაციასთან, რასაც ძალიან მწვავე და უარყოფითი გამოხმაურებები მოჰყვებოდა როგორც უკრაინის, ასევე სხვადასხვა ლიდერის მხრიდან და ისინი განსაკუთრებით უტევდნენ საქართველოს ხელისუფლებას და მოითხოვდნენ, რომ საქართველო ყოფილიყო უკრაინასთან ერთად ძალიან აქტიური რუსეთთან დაპირისპირებაში.

„დიდ გეოპოლიტიკურ მიზნებს შეეწირა ევროკავშირსა და საქართველოს შორის არსებული მთელი ეს პლასტი. ამას მოჰყვა მცდელობები საქართველოს პოლიტიკურ ცხოვრებაში პირდაპირი ჩარევისა, რაც ნიშნავდა იმას, რომ ხელისუფლებაში უნდა მოვიყვანოთ ის ძალები, რომლებიც უკრაინასთან ერთად რუსეთის წინააღმდეგ ყველა ნაბიჯზე წამსვლელები იქნებოდნენ და დავინახეთ ჩვენ ყველა არჩევნებთან დაკავშირებით ევროკავშირის მხრიდან აბსოლუტურად არაკორექტული პოზიცია. ეს პოლიტიკური მოცემულობა იყო, რამაც ეს ყველაფერი აქამდე მოიტანა. ბუნებრივია, რომ საქართველო, როგორც სახელმწიფო, ვერ ჩაებმებოდა ასეთი შანტაჟის, ჩარევის, ზეწოლისა და ქვეყნისთვის უკიდურესად დამანგრეველი პოლიტიკის ფერხულში იმისათვის, რომ ვიღაც შეგვაქებდა“, - განაცხადა ქადაგიშვილმა.

მისივე თქმით, გარკვეულმა პოლიტიკურმა ძალებმა დაინახეს, რომ საქართველოს არ უღალატია თავისი გეოპოლიტიკური არჩევანისთვის, არც დემოკრატიული პრინციპებისათვის, მაგრამ მოახერხა სუვერენიტეტისა და ეროვნული ინტერესების დაცვა.