გიორგი სოსიაშვილი: ევრობიუროკრატებს ჰქონდათ მცდელობა, რომ ებულინგებინათ ჩვენი ხელისუფლება და ქართველი ხალხი. ნამდვილად არ იმსახურებს ქართველი ხალხი, ჩვენი სახელმწიფო შანტაჟის ენით საუბარს. თუ გინდა მიიღო ამხელა ისტორიის ქვეყანა, რომელმაც თავი გადაირჩინა ისტორიის გზაზე და მოაღწია თავისი ძალიან დიდი გამძლეობით აქამდე, ბუნებრივია, რომ მას არ უნდა ელაპარაკო მუქარის ენით

ნამდვილად ბუნებრივი გზა გვაქვს დასახული ევროპისკენ, ერთიანი ევროპული ოჯახისკენ და ეს გზა მხოლოდ სლოგანებით არ არის გამოხატული. ეს გზა ჩვენ, ჩვენი არსებობის ისტორიის მანძილზე დავადასტურეთ და გარდა ამისა, კონსტიტუციაშია გაწერილი ჩვენი ევროპული არჩევანი. ეს არის ჩვენი ხელისუფლების მთავარი ამოცანა და დღის წესრიგი, - განაცხადა „დღის ქრონიკასთან“ პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, გიორგი სოსიაშვილმა.

მისი თქმით, დიალოგს ალტერნატივა არ აქვს და დადგება დღე, როდესაც ევროკავშირთან კონსტრუქციული ურთიერთობები აღდგება.

„ნუ გავაიგივებთ პერსონებს ევროპულ სტრუქტურებთან. იყვნენ ადამიანები და არიან სამწუხაროდ ევროპელი ბიუროკრატები, რომლებიც მთელი ამ ხნის განმავლობაში გამოირჩეოდნენ არც თუ სახარბიელო განცხადებებით და ბევრ მათგანს ჰქონდა მცდელობა, რომ ჩარეულიყო ჩვენი ქვეყნის შიდა საქმეებში და ებულინგებინა ჩვენი ხელისუფლება და ქართველი ხალხი. ჩვენი ევროპული მომავალი და ჩვენი ევროკავშირში გაწევრიანების სურვილი არ ნიშნავს სუვერენიტეტზე უარის თქმას და ჩვენი დამოუკიდებლობის ხელყოფას.

ჩვენ ერთი წუთითაც არ შეგვიცვლია ჩვენი დღის წესრიგი, ჩვენი გზა, ჩვენი დასახული ამოცანები, რომ ჩვენ მივალთ საბოლოო ჯამში იქითკენ, რომ გავწევრიანდებით ევროპულ ოჯახში. ბატონი შალვა პაპუაშვილის ვიზიტიც ამის ერთ-ერთი ნათელი დადასტურებაა. მას ჰქონდა ძალიან მაღალი დონის შეხვედრები ბელგიის პარლამენტის ხელმძღვანელობასთან. სხვათა შორის ბელგია გამოირჩევა თავისი კონსტრუქციული დამოკიდებულებით და ძალიან ნათლად იკვეთება მათ გზავნილებში, რომ დიპლომატიას ალტერნატივა არ გააჩნია და მკვეთრი განცხადებები და შანტაჟის ენით საუბარი ყველა მხარეს აზარალებს თავისთავად ცხადია.

ნამდვილად არ იმსახურებს ქართველი ხალხი, ჩვენი სახელმწიფო შანტაჟის ენით საუბარს. თუ გინდა მიიღო ამხელა ისტორიის ქვეყანა, ამხელა ტრადიციების, ამხელა გამოცდილების, რომელმაც თავი გადაირჩინა ისტორიის გზაზე და მოაღწია თავისი ძალიან დიდი გამძლეობით აქამდე, ბუნებრივია, რომ მას არ უნდა ელაპარაკო მუქარის ენით.

ვფიქრობ, რომ დადგება ის დღე, როდესაც დიალოგი აღდგება. სწორედ ამას ემსახურება ეს შეხვედრები, რომელიც გაიმართა ბრიუსელში“, - განაცხადა გიორგი სოსიაშვილმა.

პარლამენტის თავმჯდომარე შალვა პაპუაშვილი, დელეგაციასთან ერთად, ბელგიის სამეფოს დედაქალაქ ბრიუსელში იმყოფება.