შალვა პაპუაშვილი: მოხარული ვარ, რომ ჩემი კოლეგების მოწვევით ვიმყოფები ბელგიაში და ვსტუმრობთ ბელგიის წარმომადგენელთა პალატას და სენატს და შევხვდით მის პრეზიდენტებს

მოხარული ვარ, რომ ჩემი კოლეგების მოწვევით ვიმყოფები ბელგიაში და ვსტუმრობთ ბელგიის წარმომადგენელთა პალატას და სენატს და შევხვდით მის პრეზიდენტებს, - განაცხადა პარლამენტის თავმჯდომარემ შალვა პაპუაშვილმა ბრიუსელში შეხვედრაზე საუბრისას.

მისივე თქმით, საუბარი იყო ორმხრივ ურთიერთობებზე. ორ პარლამენტს შორის კომიტეტების დონეზეც არსებობს მჭიდრო ურთიერთობა.

„ეს ჩემი მეორე ვიზიტია ბელგიაში, 2022 წელს პარლამენტის თავმჯდომარის პოზიციიდან ჩემი პირველივე ოფიციალური ვიზიტი იყო ბელგიაში. საუბარი გვქონდა, რომ დღევანდელ ტურბულენტურ სამყაროში, მაშინ როდესაც ძალიან ადვილია მოძებნო საბაბები კონფრონტაციისთვის, განსაკუთრებულ მნიშვნელობას იძენს დიალოგისკენ სწრაფვა და იმ წერტილების მოძიება, რომელიც ჩვენ გვაერთიანებს და არა გვყოფს.

ამ კონტექსტში საუბარი გვქონდა საქართველოს და ევროკავშირს შორის ურთიერთობაზე, ვისაუბრეთ იმაზე, რომ სამწუხაროდ 2024 წლის ივნისში ევროკომისიის გადაწყვეტილებაზე, რომ შეეჩერებინა დიალოგი საქართველოსთან, რაც მიგვაჩნია, რომ იყო მცდარი გადაწყვეტილება და დღემდე ჩვენ ველით ამ დიალოგის აღდგენას. კოლეგებთან ამაზეც ვისაუბრეთ, რომ მნიშვნელოვანია წევრმა სახელმწიფოებმაც იმუშაონ ევროკავშირის ინსტიტუციებთან და დაარწმუნონ ისინი, რომ პასუხები არის არა კონფრონტაციასა და დაპირისპირებაში, არამედ პასუხები ყოველთვის არის დიალოგში.

ამიტომ მნიშვნელოვანია, რომ ბრიუსელი დაუბრუნდეს დიალოგის გზას. ჩვენ ამის მზაობას ყოველთვის გამოვთქვამდით და იმედი გვაქვს, რომ გვექნება შესაძლებლობა აღვადგინოთ დიალოგი ევროკავშირის სხვადასხვა ინსტიტუციებთან“, - აღნიშნა შალვა პაპუაშვილმა.

პარლამენტის თავმჯდომარის თქმით, ბელგია ძალიან კონსტრუქციულად არის განწყობილი გლობალურ გამოწვევებთან დაკავშირებით.

„ბელგია ძალიან კონსტრუქციულად არის განწყობილი გლობალურ გამოწვევებთან დაკავშირებით და ბელგიის პარლამენტის წარმომადგენლებმა ხაზი გაუსვეს, რომ საპარლამენტო დიპლომატია უკვე თავის თავში გამორიცხავს იმას, რომ რომ იყოს სწრაფვა კონფრონტაციისკენ, ჩვენი ვალდებულებაა, რომ იყოს დიალოგი და აზრების გაზიარება.

ჩვენ ასევე ვისაუბრეთ იმ გლობალურ გამოწვევებზე, რომელიც არსებობს სამყაროში, ვისაუბრეთ ჩვენი რეგიონის განვითარებაზე და ვფიქრობ, რომ ამ მხრივ მნიშვნელოვანი იყო, რომ ჩვენს კოლეგებს მოესმინათ ჩვენი პერსპექტივიდან დანახული ის კონფლიქტები, რომელიც დღეს ჩვენს დიდ რეგიონში არის და ასევე ის პერსპექტივები, რომელსაც ჩვენ ვხედავთ და ის მნიშვნელობა, რომელიც აქვს სამხრეთ კავკასიას და შუა დერეფანს იმისთვის, რომ ევროკავშირის და ბელგიის ჩათვლით, მისი თითოეული წევრის მოსახლეობის კეთილდღეობა იყოს უზრუნველყოფილი“, - განმარტა პაპუაშვილმა.