ComCom-ის თავმჯდომარემ პარლამენტში მედიაში არსებულ გამოწვევებზე ისაუბრა

კომუნიკაციების კომისიის თავმჯდომარემ გოგა გულორდავამ, საქართველოს პარლამენტში ანგარიშის წარდგენისას, მედიაგარემოში არსებულ გამოწვევებზე, მედიის შინაარსობრივ სტანდარტებსა და სარეკლამო კომუნიკაციებთან დაკავშირებულ საკითხებზე ისაუბრა. ინფორმაციას ComCom-ი ავრცელებს.

გოგა გულორდავამ განაცხადა, რომ სახელმწიფოს მიერ ქვეყანაში მედიაპლურალიზმი და სიტყვის თავისუფლება გარანტირებულია და მისი თქმით, ამას მედიის მრავალფეროვნება და მაუწყებლების რაოდენობაც ადასტურებს. მისივე შეფასებით, ბოლო წლებში მედია ისეთი გამოწვევების წინაშე დგას, როგორებიცაა დეზინფორმაციისა და გადაუმოწმებელი ინფორმაციის გავრცელება, პოლიტიკური და სოციალური მოვლენების მიკერძოებული ან პოლიტიკური კონტექსტით გაშუქება, ფაქტისა და მოსაზრების ერთმანეთში არევა, პოლარიზაცია, აგრესია და სიძულვილის ენა. კომისიის თავმჯდომარის შეფასებით, მედია პოლარიზაციის გაღრმავების პროცესშიც არის ჩართული, მაშინ როდესაც საზოგადოებას მიუკერძოებელი, დაბალანსებული და ფაქტებზე დაფუძნებული ინფორმაცია უნდა მიაწოდოს. მან ასევე აღნიშნა, რომ პოლარიზაციის, აგრესიისა და სიძულვილის ენის შემთხვევები სოციალურ ქსელებშიც იკვეთება.

„2025 წლის 1 აპრილს „მაუწყებლობის შესახებ“ საქართველოს კანონში განხორციელებული ცვლილებების შემდეგ, კანონის აღსრულების მიზნით, ComCom-მა შეისწავლა საერთაშორისო პრაქტიკა და შესაბამისი გადაწყვეტილებები და შეიმუშავა გზამკვლევი მაუწყებლობის შინაარსობრივ მოთხოვნებთან დაკავშირებით. გზამკვლევის მიზანია, მაუწყებლებს წინასწარ ჰქონდეთ ინფორმაცია კომისიის ხედვებისა და მიდგომების შესახებ და შეძლონ საქმიანობის კანონმდებლობის მოთხოვნებთან შესაბამისობაში წარმართვა. 2025 წლის განმავლობაში ComCom-მა აღნიშნული კანონის ფარგლებში 7 საჩივარი განიხილა, მათ შორის „ტელეიმედის“, „ტელეკომპანია პირველის“, „ფორმულას“, „მთავარი არხისა“ და „ობიექტივის“ წინააღმდეგ. 4 საჩივარი დაკმაყოფილდა; შესაბამისი მაუწყებლები სამართალდამრღვევად იქნენ ცნობილი და პასუხისმგებლობისგან გათავისუფლდნენ,“ - განაცხადა გულორდავამ.

გოგა გულორდავას თქმით, მაყურებლისა და საზოგადოების ინტერესების დაცვა და მაღალი მედიასტანდარტების დამკვიდრება კომისიის ერთ-ერთი პრიორიტეტია. მისი განცხადებით, ComCom-ი განაგრძობს „მაუწყებლობის შესახებ“ საქართველოს კანონისა და „მაუწყებელთა ქცევის კოდექსის“ მოთხოვნების აღსრულებაზე მუშაობას. მან ასევე ყურადღება გაამახვილა მაუწყებლების პროფესიულ პასუხისმგებლობაზე და ჟურნალისტიკის ფუნდამენტური პრინციპების დაცვაზე.

ანგარიშის ცალკე მიმართულება სარეკლამო კომუნიკაციებსა და პროდუქტის განთავსების წესების დაცვასაც შეეხო. გოგა გულორდავამ აღნიშნა, რომ ბოლო წლებში მაუწყებლების მხრიდან სარეკლამო კომუნიკაციების შესახებ კანონმდებლობის დარღვევის ფაქტები გახშირდა და 2025 წელს ComCom-ი ამ მიმართულებით აქტიურად ახორციელებდა მონიტორინგს და შესაბამის რეაგირებას ახდენდა. მისი შეფასებით, სპონსორობისა და პროდუქტის განთავსების წესების დარღვევისას რთულდება რეკლამისა და გადაცემის შინაარსის ერთმანეთისგან გამიჯვნა, რის გამოც ComCom-ის მიზანია, ერთი მხრივ, მაყურებლის დაცვა ფარული და შეცდომაში შემყვანი კომერციული კომუნიკაციისგან, ხოლო მეორე მხრივ - მაუწყებლის დაცვა კომერციული გავლენებისგან.

ანგარიშის თანახმად, 2025 წლის განმავლობაში პროდუქტის განთავსების წესების დარღვევის მიმართულებით ჩატარებული მონიტორინგის შედეგად 15 დარღვევა გამოვლინდა, საიდანაც 7 შემთხვევაში მაუწყებლებს ფინანსური ჯარიმა დაეკისრათ - ჯამში 47,500 ლარის ოდენობით, ხოლო 8 შემთხვევაში, მაუწყებლებმა წერილობითი გაფრთხილება მიიღეს.