ლადო სადღობელაშვილი ნიკა გვარამიაზე: არ არის გამორიცხული, რომ ორმაგ აგენტურულ ქმედებას ახორციელებდეს. ნადირობს ისეთ ამომრჩევლებზე, რომლებიც რადიკალურად არიან განწყობილები და რომლებსაც დიალოგი კი არ სურთ და ნორმალური ურთიერთობა აფხაზებთან, სურთ, ომით დაპყრობა და ცეცხლის გახსნა

მაქსიმალურად ვცდილობ, კორექტულად დავახასიათო, არ არის გამორიცხული, რომ ეს ადამიანი ორმაგ აგენტურულ ქმედებას ახორციელებდეს, - განაცხადა ანალიტიკოსმა ლადო სადღობელაშვილმა „დღის ქრონიკაში“ ნიკა გვარამიაზე საუბრისას.

მან აფხაზეთის თემაზე ნიკა გვარამიასა და გიორგი ბარამიძის მიერ გაკეთებული განცხადებები შეაფასა.

„ეს ჯგუფები არიან გადაზელილები ყველა ქვეყნის სპეცსამსახურებში. ზოგი საიდან ფინანსდება და ზოგი საიდან. არ არის გამორიცხული, რომ [მათ მიერ განცხადებების გაკეთება] შეგნებულად ხდება. შესაძლოა, არიან აფხაზეთის სეპარატისტული ძალები, რომლებსაც არ სურთ საქართველოსთან კარგი ურთიერთობა. ამასაც არ არ გამოვრიცხავ. ეს ერთ-ერთი ვარიანტია, თუმცა მისი ის განცხადება, რომ აშკარად ავნებს მას, როგორც პოლიტიკოსს, ეს ცხადია. ალბათ, ფული აქვს აღებული, ან დაფინანსებას ითხოვს, ან რაღაცაზე ხელის მომწერია და ამას აცხადებს ღიად და დაუფარავად“, - განაცხადა ლადო სადღობელაშვილმა.

იგი არ გამორიცხავს, რომ შესაძლოა, ნიკა გვარამიას მიერ გაკეთებული განცხადებები ოპოზიციის რადიკალური სეგმენტისთვის იყოს განკუთვნილი.

„ალბათ, ნადირობს ისეთ ამომრჩევლებზე, რომლებიც რადიკალურად არიან განწყობილები და რომლებსაც დიალოგი კი არ სურთ და ნორმალური ურთიერთობა აფხაზებთან, სურთ, ომით დაპყრობა და ცეცხლის გახსნა. შემდეგ ამაში დახმარების მიღება და იმ ფულების გადანაწილება. ეს არის მათი ლოგიკა“, - აღნიშნა სადღობელაშვილმა.

კოალიცია „ცვლილებისთვის“ ერთ-ერთმა ლიდერმა, ნიკა გვარამიამ, იუთუბ გადაცემაში სტუმრობისას ქართველებსა და აფხაზებს შორის არსებულ ურთიერთობებსა და კონფლიქტის მოგვარების გზებზე ისაუბრა. მისი განცხადებით, აფხაზებსა და ქართველებს ერთმანეთის მიმართ სიყვარული არ გააჩნიათ და წარსული მოვლენების გამო მხარეებს შორის ურთიერთზიზღი და მტრობა ბუნებრივად არის განპირობებული.