შალვა პაპუაშვილი: ეს ჩვენი ორგანიზაციაა და ჩვენ ვაფინანსებთ მათ შორის ევროსაბჭოს და რომ შევხედოთ, საქართველოს მოქალაქეების ფულია, რომელიც ასე წავიდა სტრასბურგში და მობრუნდა ბახმაროში „ნაცი“ პოლიტიკოსის დასაფინანსებლად. არ გვინდა ჩვენ, რომ ქართველების ფული იხარჯებოდეს „ნაცების“ რადიკალურ პროექტებზე

ეს ჩვენი ორგანიზაციაა და ჩვენ ვაფინანსებთ მათ შორის ევროსაბჭოს და რომ შევხედოთ, საქართველოს მოქალაქეების ფულია, რომელიც ასე წავიდა სტრასბურგში და მობრუნდა ბახმაროში „ნაცი“ პოლიტიკოსის დასაფინანსებლად. არ გვინდა ჩვენ, რომ ქართველების ფული იხარჯებოდეს „ნაცების“ რადიკალურ პროექტებზე , - განაცხადა პარლამენტის თავმჯდომარემ შალვა პაპუაშვილმა ბახმაროში გამართული სემინარის შეფასებისას.

ჟურნალისტმა ჰკითხა, რა საფრთხეს ხედავს ლექციებსა და სემინარებში.

„როდესაც ადამიანი არ აღიარებს არჩევნებს, ხელისუფლებას, კანონებს, არის „ნაცმოძრაობის“ სიით პარლამენტში შემოსული, რადიკალიზმის განსახიერება რომაა და ამ ადამიანს მისცემ პოლიტიკური პროექტის პლატფორმას შენი დაფინანსებით, გამოდის, რომ რადიკალიზმს აფინანსებ საქართველოში. რასაც საჯაროდ ისმენთ არმაზ ახვლედიანისგან, სავარაუდოდ, ეს ითქმის იქაც [სემინარებზე]. დემოკრატიის არ აღიარება თქვენი აზრით კრიტიკაა?! ეს არის ანტიკონსტიტუციური ქცევა. „სირცხვილიას“, „ფრანკლინის კლუბის“ და ამგვარი ყველა უცხოეთიდან დაფინანსებული პროექტების მიზანი იყო - ტვინის გამორეცხვა, რადიკალიზაცია. სწორედ ამგვარი პროექტების შედეგია, რომ საქართველოში ჩვენი ყველანაირი პროტესტების ისტორიაში პირველად, 2023 წელს გამოიყენეს „მოლოტოვის კოქტეილი“, რომელიც ადამიანს ცოცხლად წვავდა. გამოიყენა იმ ადამიანმა, გმირად რომ გამოაცხადეთ, სახელიც რომ აღარ გვახსოვს და გაქრა. მეორედ უკვე 10 „მოლოტოვის კოქტეილი“ და მაშხალები გამოიყენეს. როგორ მოხდა, რომ საბჭოთა კავშირიდან ისე გამოვედით, 9 აპრილმა ისე ჩაიარა, რომ ქართველი, პროტესტის გამომთქმელი მოძალადე არ ყოფილა?! იმის შემდეგ, სხვადასხვა ხელისუფლების დროს აქციები იმართებოდა, არასდროს ყოფილა მოძალადე აქციის მონაწილე“, - აღნიშნა პაპუაშვილმა.

მისი თქმით, ქართველებისთვის ყველაზე საამაყო იყო ხოლმე ყველა დროში ყველა აქციის მონაწილე.

„ფოთოლიც არ ჩამოვარდნილა, ვიტრინაც კი არ დამტვრეულა მაშინ, როდესაც პარიზში ამტვრევენ და ამსხვრევენ. ამტვრევენ და ამსხვრევენ-ის იდეოლოგია რომ შემოვიდა, ხომ ფაქტია?! სირცხვილია, როდესაც რადიკალი პოლიტიკოსის არმაზ ახვლედიანის გვერდით ვხედავდით ზოგიერთი ქვეყნის წარმომადგენელს, თუ ელჩს. შხამიანი თესლიდან კეთილი ნაყოფი ვერ იქნება - რადიკალი ვერ აღზრდის პატრიოტს. ყველაფერს რომ თავი დავანებოთ, ჯერ მარტო ის დააშავა ევროსაბჭოს ოფისმა, რომ „ნაციონალური მოძრაობის“ სიის წევრ პოლიტიკოსს დაუფინანსა პოლიტიკური პროექტი, რაც პირდაპირ გულისხმობს, რომ რადიკალის მხარესაა. სერგი კაპანაძე, კანდელაკი და სხვები ასე დარბიან და ხან პარტიის წევრები არიან და ხან „ენჯეოები“. სისულელეს, რომ არ არის პოლიტიკოსი, იმით გაჯერებენ, რომ ერთი-ორი ელჩი ამოუდგება და არ არის არაფერიო. სერგი კაპანაძე დიქტატორული რეჟიმის საგარეო საქმეთა მინისტრის მოადგილე იყო, ჰოპ გადახტა, გახდა არასამთავრობო ორგანიზაცია და დისკუსიაზე ეჯდათ როგორც ხალხის ხმა და „ენჯეო“. 2012 წელს ისევ გადმოხტა პოლიტიკაში, ისევ „ნაცებში“ და ვიცე-სპიკერი იყო პარლამენტში. 2020 წელს ისევ გადახტა „ენჯეოში“ და იყო [უცხოეთიდან] ფულის მიცემა და ა.შ. ეს ხომ პირდაპირ ადასტურებს, რომ ესენი არიან ადამიანები, ვინც აგენტურულ საქმეს აკეთებენ, ასრულებენ დავალებებს, რომლებიც გარედანაა წამოსული?! ჩვენ ევროსაბჭოს წევრები ვართ, ამიტომ მნიშვნელოვანია, რომ ამ კითხვებს გაეცეს პასუხი. ეს ჩვენი ორგანიზაციაა და ჩვენ ვაფინანსებთ მათ შორის ევროსაბჭოს და რომ შევხედოთ, საქართველოს მოქალაქეების ფულია, რომელიც ასე წავიდა სტრასბურგში და მობრუნდა ბახმაროში „ნაცი“ პოლიტიკოსის დასაფინანსებლად. არ გვინდა ჩვენ, რომ ქართველების ფული იხარჯებოდეს „ნაცების“ რადიკალურ პროექტებზე “, - აღნიშნა პაპუაშვილმა.

არმაზ ახვლედიანის ორგანიზებულ საგანმანათლებლო სემინარზე სამოქალაქო საკითხებს განიხილავდნენ, გრანტების შესახებ კანონის თანახმად კი, საკითხს თანხმობა სჭირდება - ჰქონდა თუ არა ბახმაროში გამართულ კრებას სახელმწიფოს თანხმობა, „ქრონიკა“ არკვევდა.

მთავრობის ადმინისტრაციის ცნობით „ევროპის საბჭოს ფინანსური მხარდაჭერით ა[ა]იპ კავშირი თბილისის პოლიტიკური სწავლების სკოლის“ მიერ ბახმაროში დაგეგმილ სემინარ-შეხვედრასთან დაკავშირებით, „გრანტების შესახებ“ კანონის მოთხოვნების შესაბამისად, უცხოური გრანტის გამცემს [დონორს] საქართველოს მთავრობისთვის თანხმობის გაცემის მიზნით არ მოუმართავს. შესაბამისად, მოცემულ საკითხთან დაკავშირებით საქართველოს მთავრობას გადაწყვეტილება არ მიუღია“.