ბიძინა გიორგობიანი: მერციც და მაკრონიც არიან განსახიერება იმ პოლიტიკური ძალისა, რომელმაც ეს ცხოვრება მოიტანა როგორც საფრანგეთში, ასევე გერმანიაში

ყველა ქვეყნის მოქალაქეები, მათ შორის, ისეთი დიდი ინდუსტრიული ქვეყნების მოქალაქეები, როგორიცაა გერმანია და საფრანგეთი, აანალიზებენ იმას, რომ არჩევნების შედეგად, სისტემური პარტიების მეშვეობით, ისინი ვერ ცვლიან თავიანთი ქვეყნების პოლიტიკურ დღის წესრიგს და შესაბამისად, ის პოლიტიკური ლიდერები, რომლებიც ამ ქვეყნებს მართავენ, ამ შემთხვევაში მერციც და მაკრონიც, არიან განსახიერება იმ პოლიტიკური ძალების, რომლებმაც ეს ცხოვრება მოიტანეს როგორც საფრანგეთში, ასევე გერმანიაში, - განაცხადა გადაცემაში „EURO ანატომია“ „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა საფრანგეთის პრეზიდენტ ემანუელ მაკრონისა და გერმანიის კანცლერ ფრიდრიხ მერცის რეიტინგებზე საუბრისას.

მისივე თქმით, საფრანგეთის პრობლემები განსხვავდება გერმანიაში არსებული პრობლემებისგან.

„საფრანგეთმა შეინარჩუნა ატომური ელექტროსადგურები და მას არ აქვს ისეთი ენერგეტიკული პრობლემები, როგორიც გერმანიას. გერმანიას აქვს ენერგეტიკული პრობლემა, ის პირდაპირ აისახა გერმანულ ეკონომიკაზე, რომელიც უკვე მესამე წელია, რაც რეცესიაშია, განსხვავებით ფრანგებისგან. ფრანგებს უფრო შიდა პროდუქტის განაწილების, ასევე სოფლის მეურნეობის პროდუქციის წარმოების პრობლემა აქვთ მას შემდეგ, რაც ბრიუსელს შემოაქვს იაფი აგროპროდუქტი სამხრეთ ამერიკიდან.

ეს ორი განსხვავებული პრობლემა აისახება მთლიანად ევროკავშირის ეკონომიკურ განვითარებაზე, რომელიც ძალიან მძიმე მდგომარეობაშია მას შემდეგ, რაც მოწყდა რუსულ იაფ ენერგორესურსებს და ჩინურ იაფ მუშახელს. ჩინური ფაბრიკა, რომელიც იყო ევროპული მომხმარებლის მომმარაგებელი, არის ძალიან შორს, ლოგისტიკურად ძალიან ძნელია დაკავშირება, ერთადერთი მშვიდობიანი ზოლი დარჩა სამხრეთ კავკასიაზე, რომელთანაც ევროკავშირის ბიუროკრატიას როგორი დამოკიდებულება აქვს, ყველასთვის ცნობილია“, - აღნიშნა ბიძინა გიორგობიანმა.