ბიძინა გიორგობიანი: ჩვენდა სამწუხაროდ, ევროკავშირი უკვე აღმოჩნდა განვითარების მხრივ ისეთ პოლიტიკურ ოფსაიდში, რომელშიც შეიყვანა კაია კალასის, ურსულა ფონ დერ ლაიენისა და მსგავსი პოლიტიკური „ლიდერების“ მოღვაწეობამ

ჩვენდა სამწუხაროდ, ევროკავშირი უკვე აღმოჩნდა განვითარების მხრივ ისეთ პოლიტიკურ ოფსაიდში, რომელშიც შეიყვანა კაია კალასის, ურსულა ფონ დერ ლაიენისა და მსგავსი პოლიტიკური „ლიდერების“ მოღვაწეობამ, - განაცხადა გადაცემაში „EURO ანატომია“ პარტია „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა.

მისივე თქმით, სამწუხაროდ, ევროკავშირი პოლიტიკურ ჩიხში შევიდა და ევროპელი ლიდერები გრძნობენ მოსახლეობის მათგან გაუცხოებას.

„ფაქტობრივად, არიან ისეთ მდგომარეობაში, რომ მოსახლეობასა და პოლიტიკურ ელიტას შორის ძალიან ძლიერი გაუცხოებაა. ეს არ არის დროებითი, ან რაღაც ისეთი მოვლენა, რომელსაც შეიძლება გვერდი აუარონ და ერთი ან ორი თვის მერე რაიმე წარმატებული ნაბიჯით შეცვალონ, რადგან, ფაქტობრივად, მათ საგარეო პოლიტიკური ალტერნატივა არ გააჩნიათ. სამწუხაროდ, ევროკავშირი შევიდა პოლიტიკურ ჩიხში, სადაც მას განვითარების ის პერსპექტივა დიდ პოლიტიკურ მოთამაშეებთან ერთად რიგში ჩაწერისა, როგორიც არის, მაგალითად, ჩინეთი, აშშ, ინდოეთი და რუსეთი, უკვე ნაკლებად აქვს. ჩვენდა სამწუხაროდ, ევროკავშირი უკვე აღმოჩნდა განვითარების მხრივ ისეთ პოლიტიკურ ოფსაიდში, რომელშიც შეიყვანა კაია კალასის, ურსულა ფონ დერ ლაიენისა და მსგავსი პოლიტიკური „ლიდერების“ მოღვაწეობამ“, - აღნიშნა გიორგობიანმა.

იგი ახლახან გერმანიაში, საქსონია-ანჰალტში „ალტერნატივა გერმანიისთვის“ (AfD) გამარჯვების ფაქტსაც შეეხო. გიორგობიანის თქმით, ამ პარტიის გამარჯვება „ძალიან ხელშესახებია და ეს იყო გერმანიის პოლიტიკურ სცენაზე მომხდარი დიდი მიწისძვრა, რომელიც პრეცედენტული იქნება“.

„ეს არჩევანი საზოგადოებისგან არის რეაქცია ბრიუსელის ბიუროკრატიის იმ პოლიტიკაზე, რომელსაც ისინი აწარმოებენ“, - განაცხადა გიორგობიანმა.