ლევან მაჭავარიანი მიქელაძის პოსტებზე: ბოღმაში დამხრჩვალი ადამიანები არიან, რომლებიც ერთი მხრივ, ხარობენ, როდესაც რაღაც უბედურება ხდება, მეორე მხრივ, როდესაც ვინმეს დამცირება შეუძლიათ და ამის შანსს ხელიდან არ გაუშვებენ

ამორალური, უზნეო ადამიანები, - ასე ეხმაურება ლევან მაჭავარიანი „ნაციონალური მოძრაობის“ აქტივისტის ზიზღის კამპანიას აქონდროპლაზიის მქონე ბავშვების წინააღმდეგ. ფრაქცია „ქართული ოცნების“ თავმჯდომარის პირველი მოადგილე ამბობს, რომ სწორედ ეს არის აგენტურის სახე.

„ეს არის აგენტურის სახე. ეს არის ზნედაცემული, ამორალური, უზნეო ადამიანთა ერთობა. სხვათა შორის, ნურც იმას დავივიწყებთ, დიუშენის სინდრომით დაავადებული ბავშვების მშობლების მიმართ როგორი აგრესია და ზიზღი გამოხატეს მას შემდეგ, რაც წამლის საკითხის დახურვისთანავე მშობლებმა მადლობა გადაუხადეს ხელისუფლებას. ბოღმაში დამხრჩვალი ადამიანები არიან, რომლებიც ერთი მხრივ, ხარობენ, როდესაც რაღაც უბედურება ხდება, მეორე მხრივ, როდესაც ვინმეს დამცირება შეუძლიათ და ამის შანსს ხელიდან არ გაუშვებენ“, - აცხადებს მაჭავარიანი.

„ნაციონალური მოძრაობის“ აქტივისტი, აქონდროპლაზიის მქონე ბავშვების დისკრიმინაციას განაგრძობს. შეურაცხმყოფელი პოსტები დარინა მიქელაძემ სოციალურ ქსელში გამოაქვეყნა, მას შემდეგ, რაც მის პირველ პოსტს მშობლების მწვავე რეაქცია მოყვა, მან დაცინვის კამპანია განაგრძო.