„ჯიპას“ ყოფილი სტუდენტი: „ჯიპას“ ლექტორები გვაიძულებდნენ, აქციებზე წავსულიყავით და ამაში გვეწერებოდა ქულები

„ჯიპას“ ლექტორები გვაიძულებდნენ, აქციებზე წავსულიყავით და ამაში გვეწერებოდა ქულები, - განაცხადა გადაცემაში „ღია ეთერი“ დარბაზის ერთ-ერთმა სტუმარმა ახალგაზრდამ. მისი რეპლიკა „ჯიპას“ დიპლომატიის ფაკულტეტის მაგისტრანტის კახა ნოზაძის განცხადებებს მოჰყვა.

ახალგაზრდა გოგონას განცხადებით, მან უნივერსიტეტის შეცვლის გადაწყვეტილება ერთ წელიწადში მიიღო.

„მე ვსწავლობდი „ჯიპაში“ და ერთ წელში შევიცვალე უნივერსიტეტი, იმიტომ, რომ თქვენი უნივერსიტეტის ლექტორები გვაიძულებდნენ, აქციებზე წავსულიყავით და ამაში გვეწერებოდა ქულები. მე უნივერსიტეტიდან გამოვიქეცი “, - მიმართა გადაცემის სტუმარმა „ჯიპას“ მაგისტრანტს, რომელმაც „ჯიპას” ყოფილი სტუდენტის განცხადებას სისულელე უწოდა.

„შეურაცხყოფაზე ნუ გადავდივართ, საუბრის დროს ერთმანეთი უნდა დავინდოთ. მსგავსი საუბრის გამო, ამ თემების გამო, რაზეც პასუხს ვერასდროს ვერ მიიღებს მოქალაქე, მე პროტესტის ნიშნად ვტოვებ სტუდიას“, - განაცხადა კახა ნოზაძემ, რასაც „ჯიპას” ყოფილი სტუდენტის რეპლიკა მოჰყვა: “უნივერსიტეტში სწავლობთ, სადაც ზურაბ გირჩი ჯაფარიძის ძმა არის ლექტორი, რაზე გვაქვს საერთოდ საუბარი, არ ვიცი“.