ლევან მაჭავარიანი ევროკავშირზე: შუა დერეფნის მნიშვნელობა გაასმაგებულია, შესაბამისად, დრო არ ითმენს, მათ მოუწევთ ადრე თუ გვიან დასხდნენ ჩვენთან, გვესაუბრონ

ჩვენ უარი განვაცხადეთ პროქსიქვეყნად საქართველოს გამოყენებაზე, - განაცხადა გადაცემაში „ღია ეთერი“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

მისი თქმით, ევროპულ სტრუქტურებთან ურთიერთობები გადაიტვირთება მაშინ, როცა ევროკავშირი რეალობას თვალს გაუსწორებს.

„როდესაც ქალბატონი ურსულა ფონ დერ ლაიენი საუბრობს შუა დერეფანზე და ამბობს, რომ საქართველო არ მონაწილეობს, როდესაც შავი ზღვის რეგიონის ქვეყნებს იწვევენ მინისტერიალზე და საქართველო, თურმე, შავ ზღვას არ ესაზღვრება, ჩვენ ხომ ყველამ ვიცით, რომ ეს აბსურდია. როდესაც რეალობას თვალს გაუსწორებენ და მიხვდებიან, რომ მიუხედავად იმისა, რომ აგენტურას თავიდან ბოლომდე თავად ჩაუტარეს საარჩევნო კამპანია, აგზავნეს საგარეო საქმეთა მინისტრები, ევროპარლამენტარები, არაფერმა არ უშველათ. შესაბამისად, უნდა ჩამოყალიბდნენ, რომ საქართველოს ჰყავს არჩეული ხელისუფლება „ქართული ოცნების“ სახით, უნდა დასხდნენ და ჩვენ გველაპარაკონ.

შუა დერეფნის მნიშვნელობა არის გაასმაგებული, შესაბამისად, დრო არ ითმენს, მათ მოუწევთ ადრე თუ გვიან დასხდნენ ჩვენთან, გვესაუბრონ. ჩვენ ვთავაზობთ ყველა დონეზე, რომ ჩვენ მზად ვართ ეს უსამართლობა გადავფურცლოთ იმისათვის, რომ მათ სახე შეინარჩუნონ და არ ჩავყვეთ არგუმენტებით მსჯელობას, მაგალითად, რატომ ეძახდნენ გამჭვირვალობის კანონს „რუსულს“ და რატომ ამბობდნენ, რომ პარლამენტის დაწვა, თურმე, დემოკრატიული აქციაა“, - განაცხადა ლევან მაჭავარიანმა.