ლევან მაჭავარიანი: კორუფციის თემაზე არც 9 და არც 12 პუნქტი არ გვჭირდება, კორუფციასთან დაკავშირებით პრობლემები არის, მაგრამ ჩვენ შეურიგებელი ბრძოლა გვაქვს გამოცხადებული

ევროკავშირის მიერ წამოყენებული 9-პუნქტიანი გეგმის ერთ-ერთი პუნქტია ის, რომ „ენჯეო“ ორგანიზაციებს უნდა ჰქონდეთ საშუალება, რომ ხელისუფლების სამივეს შტოს გადაწყვეტილებებში მონაწილეობა მიიღონ. ეს არის სუვერენიტეტის უხეში შელახვა, - განაცხადა გადაცემაში „ღია ეთერი“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

„მინდა ასევე შეგახსენოთ ვეტინგის თემა, რომელიც ფაქტობრივად სუვერენიტეტში ჩარევაა, როცა მოსამართლეებს უნდა გინიშნავდეს რაღაც კომისია, რომელიც საზღვარგარეთიდან არის შექმნილი.

თუ ჩვენ კორუფციაზე ვმსჯელობთ, ამ თემაზე ჩვენ არც 9 და არც 12 პუნქტი არ გვჭირდება, კორუფციასთან დაკავშირებით პრობლემები არის, მაგრამ ერთი რამ ხაზგასასმელია - როდესაც საქართველო, უკრაინა და მოლდოვა შეაფასეს, იქ ჩამოთვლილი იყო 6 პუნქტი, რომლითაც ყველა ქვეყანა შეგვაფასეს. უკრაინისა და მოლდოვის შემთხვევაში ადამიანის უფლებებისა და კორუფციის მუხლი ამოღებული იყო, რაც უსამართლობაა.

ჩვენ გვაქვს გამოცხადებული შეურიგებელი ბრძოლა კორუფციასთან, ქურდულ სამყაროსთან, ორგანიზებულ დანაშაულსა და მიგრაციასთან. კორუფციასთან დაკავშირებით ჩვენ რაც გამოვავლინეთ, ეს „ქართული ოცნებისთვის“ სერიოზული პოლიტიკური დარტყმა იყო, მაგრამ ჩვენ მოვიქეცით, როგორც პასუხისმგებლიანი ხელისუფლება.

რაც ირაკლი კობახიძე გახდა პრემიერ-მინისტრი, კორუფციასთან მიმართებით ყველა სამთავრობო განკარგულება გახდა გამჭვირვალე, ჩამოყალიბდა მთავრობის ეფექტიანობის დეპარტამენტი, ხედავთ, რამდენი მაღალჩინოსანია დღეს დაკავებული და კიდევ ხაზგასმით ვამბობ, რომ ეს ჩვენთვის არის პოლიტიკური დარტყმები, თუმცა ჩვენ ვართ პასუხისმგებლიანი ხელისუფლება და სხვა უფლება არ გვაქვს“, - აღნიშნა ლევან მაჭავარიანმა.