ლაშა დარსალია: ნამდვილად რთული ვითარებაა დღევანდელ მსოფლიოში. საკმაოდ დიდი გამოწვევების წინაშე ვიმყოფებით და ასეთ ვითარებაში ლავირება საკმაოდ რთულია, განსაკუთრებით, პატარა ქვეყნისთვის, რათა თავისი ინტერესები გაატაროს

„ნამდვილად რთული ვითარებაა დღევანდელ მსოფლიოში. საკმაოდ დიდი გამოწვევების წინაშე ვიმყოფებით და ასეთ ვითარებაში ლავირება საკმაოდ რთულია, განსაკუთრებით, პატარა ქვეყნისთვის, რათა თავისი ინტერესები გაატაროს“, - განაცხადა გადაცემაში „ღია ეთერი“ საქართველოს საგარეო საქმეთა მინისტრის მოადგილე ლაშა დარსალიამ.

დარსალიას თქმით, პირველ რიგში, იმსჯელებდა ამოცანებზე, შემდგომ კი საფრთხეზე, გამოწვევებზე, თუ განსაკუთრებით რის წინაშე შეიძლება იდგეს ქვეყანა, თუნდაც, სუვერენიტეტთან მიმართებით.

„ამოცანები - ზოგადად თუ ვიმსჯელებთ, ყველა ქვეყნისთვის მთავარი ამოცანა, პირველ რიგში, ეს არის უსაფრთხოება და მშვიდობა, კეთილდღეობა და განვითარება. ჩვენს შემთხვევაში ეს პრაქტიკაში გამოიხატებოდა, პირველ რიგში, ეს არის ტერიტორიული მთლიანობის საკითხები და ეს არის ევროპული და ევროატლანტიკური ინტეგრაცია, რომელიც სათანადოდ არის ჩამოყალიბებული სხვადასხვა ტიპის დოკუმენტებში. პირველ რიგში, ყველაზე მთავარ დოკუმენტში, მათ შორის ყველაზე მთავარ სტრატეგიულ დოკუმენტშიც - საქართველოს კონსტიტუციაში. როდესაც ვმსჯელობთ საფრთხეებსა და გამოწვევებზე, აქ ცალ-ცალკე ვისაუბრებდი ალბათ ამ ორზე, საფრთხეზეც და გამოწვევებზეც. სამწუხაროდ, ეს ყველასთვის ცნობილია, მთავარი საფრთხე ჩვენი სუვერენიტეტის და უსაფრთხოების მიმართ რაც არის, ეს არის ჩვენი ტერიტორიული მთლიანობის დარღვევა. ჩვენი ტერიტორიების ოკუპაცია. სამწუხაროდ, ეს განხორციელებული საფრთხეა და აქედან მომდინარეა ის საფრთხეები, რაც ემუქრება მშვიდობას ჩვენს ქვეყანაში.

გამოწვევებზე როდესაც ვსაუბრობთ, ალბათ, ვისაუბრებდი სხვადასხვა ინტეგრაციულ პროცესთან მიმართებით, რა გამოწვევების წინაშე შესაძლოა იდგეს თუნდაც იგივე ევროპული და ევროატლანტიკური ინტეგრაციის შემთხვევაში, არის თუ არა გამოწვევები და თუ არის, როგორ შეიძლება იყოს ასეთი გამოწვევები. პრინციპულად მნიშვნელოვანია, ჩვენ როდესაც ვადარებთ საფრთხეებს და გამოწვევებს, ორ სხვადასხვა რამეზე ვლაპარაკობთ. პირველ შემთხვევაში, ვსაუბრობთ მკვეთრად ნეგატიურ პროცესზე, როდესაც საქმე გვაქვს საქართველოს სუვერენიტეტის ხელყოფასთან და მეორე შემთხვევაში საუბარი გვაქვს პოზიტიურ პროცესზე, რომელსაც შესაძლოა, ახლდეს გარკვეული ფასები“, - აღნიშნა მან.