გიორგი სოსიაშვილი ძალადობრივ აქციებზე დაკავებულებზე: რა თქმა უნდა, სახელმწიფო გარკვეულ ნაბიჯებს გადადგამს იმ ადამიანების მიმართ, ვინც მოინანიებს, ვინც დაინახავს საკუთარ შეცდომას და აღიარებს ჩადენილ დანაშაულს

რა თქმა უნდა, სახელმწიფო გარკვეულ ნაბიჯებს გადადგამს იმ ადამიანების მიმართ, ვინც მოინანიებს, ვინც დაინახავს საკუთარ შეცდომას და აღიარებს ჩადენილ დანაშაულს, - განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე გიორგი სოსიაშვილმა ძალადობრივ აქციებზე, მათ შორის, 4 ოქტომბრის საქმეზე დაკავებულების შესახებ.

მისი თქმით, ეს ადამიანები დამფინანსებლებმა მიატოვეს.

„დავინახეთ ჩვენ, რომ მიატოვეს ეს ადამიანები, შეაწმინდეს ხელი მათმა დამფინანსებლებმა და პატრონებმა და საბოლოო ჯამში ციხეში უკრეს თავი თავიანთი წაქეზებებიდან გამომდინარე. ძალიან ბევრი ადამიანი ჩადგება მათ რიგში იმიტომ, რომ სახელმწიფოს წინააღმდეგ როცა ხელს აღმართავ, მაშინ უნდა გქონდეს მოლოდინი, რომ პასუხს მოგთხოვენ და ამ დანაშაულზე პასუხი უნდა აგო“, - განაცხადა სოსიაშვილმა.

როგორც ცნობილია, 4 ოქტომბრის საქმეზე დაკავებული გიორგი ჩახუნაშვილი საპროცესო შეთანხმების საფუძველზე გუშინ გათავისუფლდა, ამავე საქმეზე მსჯავრდებული ზაქრო ალბუთაშვილი კი, საპატიმროს 8 ოქტომბერს დატოვებს.