სახელმწიფო მინისტრის აპარატი: ცხინვალის რეგიონში ჩატარებული უკანონო, ე.წ. საპრეზიდენტო არჩევნები ეწინააღმდეგება საერთაშორისო სამართლის ფუნდამენტურ ნორმებსა და პრინციპებს და საერთაშორისოდ აღიარებულ საზღვრებში საქართველოს სუვერენიტეტისა და ტერიტორიული მთლიანობის მორიგ უხეშ დარღვევას წარმოადგენს

საქართველოს სახელმწიფო მინისტრის აპარატი, ოკუპირებული ცხინვალის რეგიონში უკანონო ე.წ. საპრეზიდენტო არჩევნების ჩატარებასთან დაკავშირებით განცხადებას ავრცელებს.

განცხადების თანახმად, ე.წ. საპრეზიდენტო არჩევნები ვერ გამოხატავს ხალხის თავისუფალ ნებას და შესაბამისად, მოკლებულია რაიმე სახის სამართლებრივ საფუძველსა და ლეგიტიმურობას.

„ცხინვალის რეგიონში 2026 წლის 18 სექტემბერს ჩატარებული უკანონო, ე.წ. საპრეზიდენტო არჩევნები ეწინააღმდეგება საერთაშორისო სამართლის ფუნდამენტურ ნორმებსა და პრინციპებს და საერთაშორისოდ აღიარებულ საზღვრებში, საქართველოს სუვერენიტეტისა და ტერიტორიული მთლიანობის მორიგ უხეშ დარღვევას წარმოადგენს.

რუსეთის ფედერაციის მიერ ცხინვალის რეგიონის მიმდინარე ოკუპაციისა და ეფექტური კონტროლის განხორციელების პირობებში, როდესაც რეგიონიდან იძულებით გადაადგილებულ პირებსა და ლტოლვილებს კვლავ არ ეძლევათ საკუთარ სახლებში უსაფრთხო და ღირსეული დაბრუნების შესაძლებლობა, ხოლო ადგილზე მცხოვრები მოსახლეობის ძირითადი უფლებები და თავისუფლებები უხეშად და სისტემატურად ირღვევა, ე.წ. არჩევნები ვერ გამოხატავს ხალხის თავისუფალ ნებას და შესაბამისად, მოკლებულია რაიმე სახის სამართლებრივ საფუძველსა და ლეგიტიმურობას.

საქართველოს მთავრობა კონფლიქტის მშვიდობიანი მოგვარების გაცხადებული პოლიტიკისა და პრინციპების ერთგული რჩება, რომლის განუყოფელი ნაწილია ოკუპირებულ რეგიონებში მცხოვრებ მოსახლეობასთან შერიგებისა და ჩართულობის პოლიტიკა, რაც კონფლიქტის შედეგად ხელოვნურად გაყოფილ საზოგადოებას შორის საერთო ინტერესებზე დაფუძნებული თანამშრომლობისა და ნდობის აღდგენის გაღრმავებას და კონფლიქტის შედეგად დაზარალებული მოსახლეობის სოციალურ-ეკონომიკური პირობების გაუმჯობესებას ისახავს მიზნად“, - აღნიშნულია განცხადებაში.