შალვა პაპუაშვილი: 40-ათასიანი ზღვარის გაუქმების ცვლილება პირველი ოქტომბრიდან ამოქმედდება და მიმდინარე წელს ვისაც უწევს ქონების გადასახადზე დეკლარაციის შევსება, მათზე უკვე გავრცელდება

ზოგადად, ფიზიკურ პირებთან დაკავშირებით ხელისუფლებას მკაცრი პოლიტიკა არ ჰქონია იმდენად, რომ მკაცრი ადმინისტრაცია ყოფილიყო, თორემ, არსებობს ადამიანების კატეგორია, რომელიც ქონების გადასახადის კრიტერიუმებში ჯდებოდა, მაგრამ არ ადეკლარირებდნენ ქონებას, – განაცხადა საქართველოს პარლამენტის თავმჯდომარემ შალვა პაპუაშვილმა საქართველოს პირველი არხის გადაცემაში „დისკუსია აქტუალურ თემაზე“.

„გუშინ ითქვა, რომ ვაინიციირებთ 40-ათასიანი ზღვარის გაუქმებას და ვთქვით, რომ ეს 81 ათას პირს შეეხება, ვინც იხდის ქონების გადასახადს. ამაზე კარგი რა უნდა თქვა, მაგრამ დღეს ვკითხულობდი, რომ 81 ათას პირზე მეტს არ აქვს 40 ათასზე მეტი შემოსავალიო, ანუ ეკონომიკური ზრდა ტყუილიაო. მაინც რომ განვმარტო, ეს 81 ათასი ადამიანი არის ის კატეგორია, რომელთაც 40 ათასზე მეტი შემოსავალი ჰქონდათ წლიურად და პლუს ჰქონდათ საკუთარ თავზე რეგისტრირებული უძრავი ქონება – ეს ორივე პირობა უნდა ყოფილიყო. ზოგადად, ფიზიკურ პირებთან დაკავშირებით ხელისუფლებას მკაცრი პოლიტიკა არ ჰქონია იმდენად, რომ მკაცრი ადმინისტრაცია ყოფილიყო, თორემ, ზოგადად თუ შევხედავთ, არსებობს ადამიანების კატეგორია, რომელიც ამ კრიტერიუმებში ჯდებოდა, მაგრამ არ ადეკლარირებდნენ ქონებას“, – განაცხადა პაპუაშვილმა.

მისი თქმით, ცვლილება პირველი ოქტომბრიდან ამოქმედდება.

„ეს მნიშვნელოვანი ინიციატივა არის. იყო ამაზე საუბარი. ზღვარი დაწესდა, თუ არ ვცდები, 20 წლის წინ დაახლოებით და იყო მოლოდინი, რომ გადახედილიყო. გვქონდა ამაზე მსჯელობა, ფინანსთა მინისტრთან და პრემიერ-მინისტრთან ერთად ბოლოს უმრავლესობის სხდომაზეც ვიმსჯელეთ ამაზე, რომ 40-ათასლარიანი ზღვარი მოიხსნას და 100 ათას ლარს ქვემოთ ვისაც აქვს წლიური შემოსავალი, ყველა ადამიანი გათავისუფლდება ქონების გადასახადისგან. 2025 წლის მონაცემებით, 81 ათასი ადამიანი იხდიდა ამ გადასახადს კეთილსინდისიერად. ერთი ამდენია, სავარაუდოდ კიდევ, ვინც არ ადეკლარირებდა.

ცვლილება პირველი ოქტომბრიდან ამოქმედდება. ჩვენ მომავალ სასესიო კვირას მივიღებთ ამ ცვლილებას. ასე რომ, მიმდინარე წელს ვისაც უწევს ქონების გადასახადზე დეკლარაციის შევსება, მათზე უკვე გავრცელდება. ადამიანები, რომელთაც შემოსავალი 100 ათასზე ნაკლები აქვთ, შეუძლიათ მშვიდად იყვნენ და წლევანდელი წლიდან დაივიწყონ დეკლარაციის შევსება. რა თქმა უნდა, აქაც მნიშვნელოვანია ბალანსი. ქონების გადასახადი არის შემოსავალი, რომელიც მუნიციპალიტეტებში მიდის და მნიშვნელოვანია. ამას სახელმწიფო, რა თქმა უნდა, დააკომპენსირებს“, – განაცხადა შალვა პაპუაშვილმა.