თენგიზ შარმანაშვილი გახარიას პარტიაზე: შევეცდებით სასამართლოს წარვუდგინოთ არგუმენტები, რომ ეს პარტიაც ისეთივე არაკონსტიტუციურია, როგორიც სხვა დანარჩენი პარტიები, რომლებზეც აქამდე შესაბამისი სარჩელი შევიტანეთ

თენგიზ შარმანაშვილი „დღის ქრონიკაში“ გამოეხმაურა უმრავლესობის წევრების გადაწყვეტილებას, რომლის მიხედვით საკონსტიტუციო სასამართლოში შეტანილ სარჩელს, რომელიც რიგი პარტიების აკრძალვას ითვალისწინებს, დაემატება პარტია „გახარია საქართველოსთვის“.

თავდაცვისა და უსაფრთხოების კომიტეტის თავმჯდომარის პირველმა მოადგილემ აღნიშნა, რომ შეეცდებიან სასამართლოს წარუდგინონ არგუმენტები, რომ ეს პარტიაც ისეთივე არაკონსტიტუციურია, როგორიც სხვა დანარჩენი პარტიები, რომლებზეც აქამდე სარჩელი უკვე შეტანილია.

მათ მიეცათ შანსი, რომ ამ დესტრუქციულ ნარატივში არ ჩარჩენილიყვნენ, ან ანტიკონსტიტუციური ქმედებებით არ გაეგრძელებინათ თავიანთი საქმიანობა. მიუხედავად იმისა, რომ მათ ხალხისგან მიიღეს შესაბამისი მანდატები, რომ პარლამენტში ყოფილიყვნენ წარმოდგენილები, არ შემოვიდნენ და მათთვის დაკისრებულ კონსტიტუციურ მოვალეობას არ ასრულებდნენ.

მათ გადადგეს ყველა ის ნაბიჯი, რა ნაბიჯიც გადადგა „ნაციონალურმა მოძრაობამ“ და სხვა ანტიკონსტიტუციურმა პარტიებმა, რომლებიც პირდაპირ ასრულებენ უცხოურ დაკვეთებს.

ის, რომ ისინი აგრძელებენ არაკონსტიტუციურ საქმიანობას, დამატებით იქნება ეს საკითხები განხილული, განვლილი პერიოდიც და შემდეგი პერიოდიც.

საკითხი საკონსტიტუციო სასამართლოში იქნება განხილული, მხარეებს მიეცემათ საშუალება მასალებს გაეცნონ, ოპონირება გაუწიონ, შევიდნენ შეჯიბრში და ამტკიცონ ის, რომ ჩვენს სარჩელს საფუძველი არ აქვს.

ჩვენ შევეცდებით საპირისპირო დავასაბუთოთ და სასამართლოს წარვუდგინოთ არგუმენტები, რომ ეს პარტიაც ისეთივე არაკონსტიტუციურია, როგორიც სხვა დანარჩენი პარტიები, რომლებზეც აქამდე შევიტანეთ შესაბამისი სარჩელი“, - აღნიშნა შარმანაშვილმა.

უმრავლესობის წევრების გადაწყვეტილებით, მიმდინარე კვირაში საკონსტიტუციო სასამართლოში შეტანილ სარჩელს, რომელიც რიგი პარტიების აკრძალვას ითვალისწინებს, დაემატება პარტია „გახარია - საქართველოსთვის“.