თენგიზ შარმანაშვილი: საქართველოში ყველა პოლიტიკურმა მოთამაშემ უნდა იცოდეს და ეს პრეცედენტები შეიქმნას, რით შეიძლება დაასრულოს პოლიტიკურმა ორგანიზაციამ, თუ ის კონსტიტუციის ფარგლებს გარეთ იმოქმედებს

საქართველოში ყველა პოლიტიკურმა მოთამაშემ უნდა იცოდეს და ეს პრეცედენტები შეიქმნას, რით შეიძლება დაასრულოს პოლიტიკურმა ორგანიზაციამ, თუ ის კონსტიტუციის ფარგლებს გარეთ იმოქმედებს, - განაცხადა თავდაცვისა და უსაფრთხოების კომიტეტის თავმჯდომარის პირველმა მოადგილემ თენგიზ შარმანაშვილმა „დღის ქრონიკაში“.

წამყვანმა ჰკითხა, რა გავლენას მოახდენს „ქართული ოცნების“ საკონსტიტუციო სარჩელი პარლამენტს გარე არსებულ ოპოზიციაზე, რომლებიც თვითგანადგურების რეჟიმში არიან.

„ეს ორგანიზაციები ისედაც თვითგანადგურების რეჟიმში არიან და ამას ყოველდღე უყურებს მაყურებელი. ან როგორ მიმართავენ ერთმანეთს, ან რაში სდებენ ბრალს - მოღალატეობაში, ფულის აღებაში. ჩვენ რომ არ გაგვიკეთებია ჩვენი ოპონენტებისთვის, იმაშიც კი სდებენ ბრალს. ასეთი რადიკალური განწყობილებით ჩვენც კი არ ვყოფილვართ უცხო ქვეყნიდან მართული ე.წ ოპოზიციის მიმართ. ეს [საკონსტიტუციო სარჩელი] საჭიროა ერთი რამის გამო - თუნდაც ისევ ჩვენთვის, მმართველი პარტიისთვის. საქართველოში ყველა პოლიტიკურმა მოთამაშემ უნდა იცოდეს და ეს პრეცედენტები შეიქმნას, რით შეიძლება დაასრულოს პოლიტიკურმა ორგანიზაციამ, თუ ის კონსტიტუციის ფარგლებს გარეთ იმოქმედებს. ის, რის გამოც მე სარჩელი დავწერე და შევიტანე საკონსტიტუციო სასამართლოში, იმავეს ხომ მე ვერ გავაკეთებ?!“ - აღნიშნა შარმანაშვილმა.

ახალი საკონსტიტუციო სარჩელით ,„ქართული ოცნება“ პარტია „გახარია - საქართველოსთვის“ აკრძალვასაც ითხოვს. მმართველი პოლიტიკური პარტიის მიერ მომზადებულ სარჩელში უკვე მოთხოვნილია „ნაციონალური მოძრაობის“, „კოალიცია ცვლილებისთვის“, „ძლიერი საქართველო - ლელოს“ და „ფედერალისტების“ აკრძალვა და მათი საქმიანობის არაკონსტიტუციურად ცნობა.