ლევან მაჭავარიანი: ​გახარიების პარტია წარმოადგენს იმ კოლექტიურ ძალას, ვისაც ჩვენ აგენტურულ რადიკალურ ოპოზიციას ვუწოდებთ. ეს არის ძალა, რომელიც საქართველოში მშვიდობის წინააღმდეგ იბრძვის

გახარიების პარტია წარმოადგენს იმ კოლექტიურ ძალას, ვისაც ჩვენ აგენტურულ რადიკალურ ოპოზიციას ვუწოდებთ, იგივე კოლექტიური ნაცმოძრაობა. შესაბამისად, ძალიან ლოგიკურია, რომ რახან დანარჩენ პარტიებზე არის შეტანილი სარჩელი, ეს განხილვა არ მოხდეს გახარიას პარტიის გარეშე, - განაცხადა ლევან მაჭავარიანმა მმართველი პარტიის ახალ სარჩელზე საუბრისას. საპარლამენტო ფრაქცია „ქართული ოცნების“ თავმჯდომარის პირველი მოადგილე აღნიშნავს, რომ ეს პარტია რევოლუციურ პროცესებშია ჩართული და ქვეყანაში მშვიდობის წინააღმდეგ იბრძვის.

„​ყველას შევახსენებ, ეს არის ის ძალა, რომელმაც 2021 წლის არჩევნების მერე კოალიცია ჩამოაყალიბა უშუალოდ დედა „ნაციონალურ მოძრაობასთან“ ოთხ მუნიციპალიტეტში. ეს არის ის ძალა, რომელიც იბრძვის საქართველოში მშვიდობის წინააღმდეგ, რომელიც ჩართულია რევოლუციურ პროცესებში“, - განაცხადა მაჭავარიანმა.

„ქართული ოცნება“ ახალი საკონსტიტუციო სარჩელით პარტია „გახარია - საქართველოსთვის“ აკრძალვასაც ითხოვს. მმართველი პოლიტიკური პარტიის მიერ მომზადებულ სარჩელში, უკვე მოთხოვნილია „ნაციონალური მოძრაობის“, „კოალიცია ცვლილებისთვის“, „ძლიერი საქართველო - ლელოს“ და „ფედერალისტების“ აკრძალვა და მათი საქმიანობის არაკონსტიტუციურად ცნობა.