AfD-ს დეპუტატი: ამჟამინდელი ევროკავშირი, ყველაზე მცირე, თავიდან არის ასაშენებელი, ამას კი ძირეული ცვლილებები და არსებულის მოშთობა სჭირდება, რაიმე ახალი უნდა შეიქმნას

ამჟამინდელი ევროკავშირი, ყველაზე მცირე, თავიდან არის ასაშენებელი, ამას კი ძირეული ცვლილებები და არსებულის მოშთობა სჭირდება, რაიმე ახალი უნდა შეიქმნას, - განაცხადა „იმედის კვირასთან“ ინტერვიუში AfD-ს დეპუტატმა კრისტიან მერტენსმა.

გერმანელი დეპუტატი რეგიონულ არჩევნებში AfD-ს გამარჯვებას ისტორიულს უწოდებს და ამბობს, რომ საქსონია-ანჰალტის მოსახლეობის დიდი უმრავლესობის ხმები მიიღო იმ პოლიტიკურმა ძალამ, რომელიც პოლიტიკის წარმოებას მხოლოდ და მხოლოდ გერმანელი ერის ინტერესების შესაბამისად აპირებს.

„ეს არჩევნები ხელისუფლების უდიდესი მარცხია, მმართველი პარტიის მხარდაჭერა განახევრებულია. მძიმე პოლიტიკური დარტყმა მიიღო მერცის ხელისუფლებამ, ეს შედეგი ხომ კანცლერ მერცის მიერ გატარებული პოლიტიკის კრიტიკაა მოსახლეობის მხრიდან.

საქსონია-ანჰალტისთვის, ზოგადად გერმანიისთვის ამ არჩევნებში AfD-ს გამარჯვება ნიშნავს სწორი სახელმწიფოებრივი მიმართულებით გადადგმულ ძალიან დიდ ნაბიჯს. ჩვენ ვაპირებთ, რომ გერმანიას ეროვნული იერსახე დავუბრუნოთ. დიდი წნეხის ქვეშ გვიწევს წინსვლა, მაგრამ დარწმუნებული ვარ, რომ საქმეს ბოლომდე მივიყვანთ“, - განაცხადა გერმანელმა კანონმდებელმა.

მისივე თქმით, ხელისუფლება AfD-ზე წარმოუდგენლად დიდ ზეწოლას ახორციელებს. დეპუტატს ერთ-ერთ მაგალითად არჩევნებამდე ორი კვირით ადრე, ორი საარჩევნო კანდიდატის სახლების ჩხრეკა მოჰყავს.

„სურთ აკრძალონ პარტია AfD. ეს თავისთავად ძალაუფლების შენარჩუნებისთვის გადადგმული ნაბიჯებია, ვინაიდან, ხელისუფლებას არ შეუძლია ჩვენთან შინაარსიანი დაპირისპირება, მათთვის გამოსავალია, რომ უბრალოდ მოახრჩონ AfD.

მხოლოდ საქსონია-ანჰალტის რეგიონში AfD-ს წინააღმდეგ აღძრული საქმეების საქაღალდეც კი სქელტანიანია, 160 გვერდიანი სიაა.

თქვენ ვერც კი წარმოიდგენთ, ჩემს წინააღმდეგ რამდენი საქმეა აღძრული, რამდენი ჯარიმა არის ჩემს სახელზე გამოწერილი და რამდენი სასამართლო სხდომა მაქვს დანიშნული.

პოლიტიკურ და სამართლებრივ მოცემულობათა დინამიკის შედარება ნათელს ხდის, რომ მიზანი ამ პროცესებისა გახლავთ AfD-ს აკრძალვა“, -განაცხადა AfD-ს დეპუტატმა.

კრისტიან მერტენსი პარალელურად ევროკავშირს სახელმწიფოთა სუვერენულ, შიდა საქმეებში ჩარევის გამო აკრიტიკებს.

„იყო დრო, როდესაც ევროკავშირი კარგი იდეა გახლდათ. დროთა განმავლობაში კი, ევროკავშირს ყავლი გაუვიდა. ის ჩამოყალიბდა არავისგან არჩეული ევრობიუროკრატიად, რომელიც უფრო და უფრო უხეშად, პირდაპირ ერევა სახელმწიფოთა სუვერენულ, შიდა საქმეებში. ამჟამინდელი ევროკავშირი, ყველაზე მცირე, თავიდან არის ასაშენებელი, ამას კი ძირეული ცვლილებები და არსებულის მოშთობა სჭირდება, რაიმე ახალი უნდა შეიქმნას. ამჟამინდელი ევროკავშირი ერების გამანადგურებელია, ქვეყნების მომსპობი, ევროკავშირი ებრძვის ეროვნულ კულტურებს, თვითშეგნებას, ეროვნულ ცოდნასა და ცნობიერებას, ყველა ერი ერთმანეთს სურთ დაამსგავსონ“, - მიაჩნია გერმანელ დეპუტატს.