გივი მიქანაძე: ახალ სასწავლო წელს 30-მდე სრულად განახლებული და ახლად აშენებული სკოლით ვხვდებით. შარშან, ახალ სასწავლო წელს 60-მდე ასეთი სკოლა გავხსენით, ეს იმის მაჩვენებელია, რომ პროცესი არ ჩერდება, თუმცა გამოწვევა პატარა მასშტაბის არ არის

„ახალ სასწავლო წელს 30-მდე სრულად განახლებული და ახლად აშენებული სკოლით ვხვდებით. შარშან ახალ სასწავლო წელს 60-მდე ასეთი სკოლა გავხსენით, ეს იმის მაჩვენებელია, რომ პროცესი არ ჩერდება“, - განაცხადა გადაცემაში „ღია ეთერი“ საქართველოს განათლების, მეცნიერებისა და ახალგაზრდობის მინისტრმა გივი მიქანაძემ.

მინისტრის თქმით, ზოგადად, ინფრასტრუქტურა ერთ-ერთი ძირითადი გამოწვევაა.

„მინდა გითხრათ, რომ დამოუკიდებლობის აღდგენის შემდგომ, სამი ათწლეულის განმავლობაში, თუ ბოლო სამი წლის პერიოდს არ ჩავთვლით, ინფრასტრუქტურა ფაქტობრივად არ განახლებულა. ახალი სკოლების მშენებლობა და სრული რეაბილიტაცია შეიძლება თითებზე ჩამოსათვლელი იყოს ამ 30-32 წლიანი პერიოდის განმავლობაში. სწორედ სამი წლის წინ, სამი წელიწადია, რაც აქტიურად დაიწყო ეს ყველაფერი. ის სასკოლო ინფრასტრუქტურა, რომელიც 60-70-იანი წლების ინფრასტრუქტურაა, მაშინდელი აშენებული, ერთიანად დაგვაწვა.

იცით, რომ სკოლების რაოდენობა საკმაოდ დიდია. მთელი ქვეყნის მასშტაბით 2085 საჯარო სკოლა გვაქვს. რა თქმა უნდა, უკვე ამ სამ წელიწადში ჩვენ გვაქვს ხელშესახები შედეგები და არაერთ რეგიონში, ქალაქში ვარ ნამყოფი. ხალხი ძალიან გახარებული, ბედნიერია, როდესაც ხედავს, როგორი სტანდარტის, როგორი განახლებული ინფრასტრუქტურაა. ჩვენთვის მნიშვნელოვანია, რომ მაქსიმალურად ჯანსაღი გარემო იყოს. არამხოლოდ მოსწავლისთვის, არამედ მასწავლებლისთვის, რომლისთვისაც ის მუდმივი სამუშაო ადგილია. რასაც ჰქვია, გული უნდა ჩადოს იმ ყველაფრისთვის და უნდა მიუხაროდეს. მასწავლებელს ისედაც მიუხარია სკოლაში ბავშვებთან ურთიერთობისთვის, მაგრამ ჩვენ ამ პროცესს ხომ ხელი უნდა შევუწყოთ.

გეტყვით იმასაც, რომ თუნდაც ახალ სასწავლო წელს 30-მდე სრულად განახლებული და ახლად აშენებული სკოლით ვხვდებით. შარშან ახალ სასწავლო წელს 60-მდე ასეთი სკოლა გავხსენით. ეს იმის მაჩვენებელია, რომ პროცესი არ ჩერდება, თუმცა გამოწვევა პატარა მასშტაბის არ არის. სწორედ აქ ვეძებთ ჩვენ გამოსავალს, თუ როგორ შეიძლება ეს ყველაფერი ეტაპობრივად გადაიჭრას. ამასთანავე, იმასაც ვიტყვით, რომ ყველაფერი ჩვენზე ვერ და არ იქნება დამოკიდებული, ვინაიდან ღიად გაცხადებული პოლიტიკური ნებაა, შესაბამისი ფინანსური უზრუნველყოფაა გამოყოფილი, თუმცა არაერთი შემთხვევაა, როდესაც ტენდერში გამარჯვებული კომპანია ძალიან არაკეთილსინდისიერად მოიქცა. მოგვიწია მისი დაჯარიმება. კონკრეტული საქმეებია გენერალურ პროკურატურაში გადაგზავნილი, მაგრამ ეს მშობელს არ აინტერესებს. მშობელს აინტერესებს, სკოლა როდის იქნება და ბავშვი როდის მივა იმ სკოლაში. ეს ჩვენი პრობლემებია. ამას იმისთვის კი არ ვამბობ, რომ თავს ვიმართლებთ. უბრალოდ, ეს არის ის რეალობა, რომელსაც ვერ გავექცევით“, - აღნიშნა გივი მიქანაძემ.